چیرۆکی کۆڵنەدانی کچێکی نێو خێزانی تێکۆشەری دێموکرات
(هەموو ساڵێک لە کۆتایی وەرزی خوێندندا، چەندین کچ و ژنی تێکۆشەر لە ڕیزەکانی «حیزبی دێموکراتی کوردستانی ئێران»دا، قۆناغەکانی خوێندن و زانکۆ بە سەرکەوتوویی و بە پلەی بەرز دەبڕن و دەبنە مایەی شانازی بۆ حیزب و بنەماڵە گەورەکەی دێموکرات).
من «کوێستان نەستانی»، ئێستا مامۆستای زانکۆ، ئەندامی حیزبی دێموکراتی کوردستانی ئێران و ئەندامی یەکێتیی نەتەوەیی خوێندکارانم؛ لە نێو جەرگەی شۆڕش و خەباتدا توانیم لە بواری ئەکادیمیدا درێژە بە خوێندنی باڵا بدەم.
لەدایکبووی گوندی «چوالان»ی ڕۆژهەڵاتی کوردستانم. بەهۆی خەباتی سیاسیی بنەماڵەکەمەوە، ساڵی ١٩٨٧ لە تەمەنی منداڵیدا ڕوومان کردە باشووری کوردستان و لە نێو کەمپەکانی حیزبی دێموکراتی کوردستانی ئێراندا ژیانمان بەسەر برد. وەک کچە تێکۆشەرێکی نێو بنەماڵەیەکی خەباتکار، قۆناغەکانی خوێندنم لە ناوچە جیاجیاکانی باشووری کوردستاندا بڕی؛ قۆناغی سەرەتاییم لە قوتابخانەی «نیشتمان» لە بناری قەندیل و گوندی «لێوژێ» (تایبەت بە حیزبی دێموکرات) تەواو کرد.
دواتر لە ساڵی ١٩٩٢دا، بەهۆی بۆردومانکردنی بنکە و بارەگاکانی حیزب و ڕاگواستنی بنەماڵەکان بۆ شاری کۆیە، قۆناغەکانی ناوەندی و ئامادەییم لەو شارە تەواو کرد. هەر لەوێ، لە ساڵی ٢٠٠٨دا بڕوانامەی بەکالۆریۆسم بەدەست هێنا. توێژینەوەی دەرچوونەکەشم لەسەر ژیان و ڕۆڵی سیاسی و ڕۆشنبیریی کەسایەتیی دیار «عەبدوڵڵا حەسەنزادە» بوو؛ بەهۆی سەرکەوتوویی توێژینەوەکەم، پێشنیازم بۆ کرا بیکەم بە کتێب، هەر بۆیە لە هەمان ساڵدا چاپ و بڵاوم کردەوە.
ساڵی ٢٠١٠ دەرفەتێکی خوێندنی ماستەرم لە وڵاتی فەڕەنسا بۆ ڕەخسا، بەڵام بەداخەوە بەهۆی کێشەی بێناسنامەیی و نەبوونی پاسپۆرت، نەمتوانی ئەو هەلە بقۆزمەوە و کورسیی خوێندنەکە مسۆگەر بکەم. سەرەڕای ئەمەش و وێڕای پێکهێنانی ژیانی هاوژینی لەگەڵ پێشمەرگە و کادری حیزب «ئیبراهیم بێهرووزی» و سەرقاڵبوون بە پەروەردەکردنی منداڵ و بەڕێوەبردنی ئەرکی ماڵ و کارکردن لە دەرەوە، هەرگیز کۆڵم نەدا و وازم لە خوێندن نەهێنا.
ساڵی ٢٠١٩ جارێکی تر دەستم بە خوێندنی ماستەر لە پسپۆڕیی «مێژووی هاوچەرخی کورد» کردەوە و لە ساڵی ٢٠٢١دا بڕوانامەکەم بەدەست هێنا. لە ساڵی ٢٠٢٢ەوە وەک مامۆستای یاریدەدەر لە زانکۆ دەستم بە وانەبێژی کرد. جیا لە هەوڵە ئەکادیمییەکانم، لە ڕابردوو و ئێستاشدا لە چالاکییە سیاسی و مەدەنییەکانی نێو هەردوو ڕێکخراوی «یەکێتیی لاوانی دێموکراتی ڕۆژهەڵاتی کوردستان» و «یەکێتیی نەتەوەیی خوێندکاران»دا بەشداریم کردووە.
هەر لە درێژەی هەوڵەکانمدا، ڕۆژی دووشەممە ١٠ی خاکەلێوەی ١٤٠٥ی هەتاوی (٣٠ی مارسی ٢٠٢٦ی زاینی)، بەهۆی بەردەوامبوونم لە نووسینی توێژینەوەی ئەکادیمی، پلەی زانستیم لە «مامۆستای یاریدەدەر»ەوە بۆ پلەی «مامۆستا» بەرز بووەوە.
بێگومان ئەم سەرکەوتنانەم بێ پشتیوانیی دایک و باوکی خۆشەویستم (عیسمەت نەستانی و ئەحمەد نەستانی) و هاوژینە تێکۆشەرەکەم (ئیبراهیم بێهرووزی) نەدەهاتنە دی؛ بۆیە لێرەوە سوپاسی بێپایانی بنەماڵەکەم دەکەم کە لە تەواوی قۆناغەکانی ژیان و سەرکەوتنمدا هاوکار و پاڵپشتم بوون.
