لە درێژەی شەپۆلی نوێی دەسبەسەرکردن و ڕفاندنی هاووڵاتییان لە ڕۆژهەڵاتی کوردستان، چارەنووسی ژمارەیەک ژنی کورد کە لەلایەن هێزە ئەمنییەکانی کۆماری ئیسلامیی ئێرانەوە دەسبەسەر کراون، نادیارە و نیگەرانییەکی زۆر لەسەر ژیانیان دروست بووە.
بەپێی ئەو زانیارییانەی “خۆڕاگری” بڵاوی کردووەتەوە، لە ماوەی ڕۆژانی ڕابردوودا چەندین ژنی کورد لە شارەکانی ورمێ، سەقز و بۆکان بەبێ بوونی هیچ بەڵگەیەکی یاسایی و دادوەری ڕفێندراون و بۆ شوێنێکی نادیار گواستراونەتەوە.
دۆخی نادیاری گیراوان :
حەدیس حەقیقی: چالاکوانی تۆڕە کۆمەڵایەتییەکان (تەمەن ٢١ ساڵ)، زیاتر لە مانگێکە لە شاری ورمێ دەسبەسەر کراوە. هێزە ئەمنییەکان بە توندوتیژییەکی زۆرەوە هەڵیانکوتاوەتە سەر ماڵەکەی و جگە لە خۆی، باوکیشی دەسبەسەر کردووە
سەحەر مێهدی: هاووڵاتییەکی تەمەن ٣٢ ساڵەی خەڵکی سەقزە، کە لەلایەن ئیدارەی ئیتلاعاتەوە بە تۆمەتی بێبنەمای “سیخوڕی” دەسبەسەر و بۆ شوێنێکی نادیار ڕاگوێزراوە.
شلێر مامقادری: ژنێکی تەمەن ٣٤ ساڵ و دایکی دوو منداڵە، زیاتر لە ٢٠ ڕۆژە چارەنووسی نادیارە. ناوبراو کە تووشبووی نەخۆشیی شێرپەنجەیە، لە مافی چاوپێکەوتن و وەرگرتنی چارەسەری پزیشکی بێبەش کراوە.
نیگەرانییەکان لە دۆخی تەندروستیی گیراوان: لە نێو دەسبەسەرکراواندا، دۆخی “مریەم داودیان” (تەمەن ٥٨ ساڵ) خەڵکی بۆکان، نیگەرانیی جددی لای بنەماڵەکەی دروست کردووە. ناوبراو بەهۆی تووشبوون بە نەخۆشییەکانی شەکرە، تالاسیمیا و ڕۆماتیزمەی جومگەکان، پێویستی بە چاودێریی بەردەوامی پزیشکییە، بەڵام سەرەڕای دۆخی تەندروستیی ناجێگیر، لە گرتنگەیەکی ورمێ ڕاگیراوە و لە دەرمان بێبەش کراوە.
کۆماری ئیسلامیی ئێران لە ڕێگەی دەسبەسەرکردنی سەرەڕۆیانە و بێبەشکردنی گیراوان لە مافی پارێزەر و چاوپێکەوتن، گوشار دەخاتە سەر چالاکوانان و هاووڵاتییان. لە زۆربەی ئەو حاڵەتانەدا، هێزە ئەمنییەکان بەبێ نیشاندانی فەرمانی دادگا و بە شێوەیەکی دڕەندانە هەڵدەکوتنە سەر ماڵی هاووڵاتییان و لەدوای ڕفاندنیان، هیچ زانیارییەک لەسەر تۆمەت و شوێنی ڕاگیرانیان بە بنەماڵەکانیان نادەن. ئەم ڕەفتارانە بە پێشێلکاریی ڕاشکاوی مافی مرۆڤ و یاساکانی پەیوەندیدار بە گیراوان ئەژمار دەکرێن.
