جیهان بێتووشی
زۆر جار باوەر کردن بە مردنی هەندێ کەس ئەستەمە بە تایبەت ئەو کەسانەی کە تایبەتن لە ژیاندا پێگەی تایبەت بەخۆیان هەیە و لەسەر پێی خۆیان راوەستاون و بوونە بەشێکی جوانی کۆمەڵگا.
هاوژین و مەرگێکی لەناکاو
هاوژین کچێکی ئازاو خوێن گەرم و خۆشەویست لە ژیاندا ئازاری زۆری کێشا بەدەست کێشەی تەندوستی بەڵام ئازایانە ڕووبەڕووی بۆوە.
دواتر لە تەمەنێکی کەمدا باوکی لەدەستدا تەنانەت نەیتوانی گۆرێک بۆ باوکی دروست بکا بەڵام ئەو هەمێشە وەکو کەسوکارێکی دڵسۆز سەردانی گۆرستانی گۆڕ غەریبانی دەکرد پەیمانی لەگەڵ هاورێ شەهیدەکانی باوکی نوێ دەکردەوە هاوژین کچێکی زیرەک و ئازا هەرزوو هەوڵی دا لەسەر پێی خۆی بوەستێ و خۆی دروست بکا وەکو هەموو کچە ئازاکانی پەروەردەکراوی ڕێگای دێموکرات درێژەی بەرێگا و ڕێبازی باوکیدا و خوێنەر و نوسەرێکی باش بوو تا ئەگەر وەکو باوکی نەیتوانی بە چەکیش بەرگری بکا لە خاک و نیشتیمان قەڵەمەکەی بکاتە چەکێکی بەهێز بۆ درێژەدان بە ڕێبازی باوکی.
هاوژین هەمیشە هەوڵیدەدا گرینگی بە مەسەلەی ژن و باسکردن لە تەندوتیژی دژ بە ژنان و ئەو هەل و مەرجە نالەبارەی کە ژنان لە کۆمەڵگەی کوردیدا بەدەستیەوە دەناڵێنن ببێتە بەر باس و پێیان بڵێ هیچ شتێک بەربەست نییە لە سەرکەوتن و گەشتن بەئاواتەکانیان یارمەتیدەرێکی باشی کچان و ژنانی دەوروبەی خۆی بوو ئەمەشی هەر لە دایک و خوشکیەوە دەست پێکردبوو هەوڵی دابوو ببێتە دایک و باوک و کەس بۆیان.
لە هاورێکانیەوە گوێم لێبوو دەیانگوت
هاوژین دڵپاک و دل گەورە بوو یارمەتیدەرێکی باشی هەژاران و ئەو کەسانە بوو کە پێویستیان پێی بوو.
براکەی هاوژین دەڵێ
هاوژین ڕووناکی مالەکە و کۆڵەکەی ماڵەکە بوو پشت و پەنا بوو یارمەتیدەربوو تا ماندووبوونی ژیانم کەمتر بێت چونکە لەسەر پێی خۆی راوەستاو کاری کرد و بوو بە هێمای ئازایەتی بۆ کچانی دەوروبەری.
لە دایکیم پرسی هاوژین چۆن وەسف دەکەی
وتی هیچ ناتوانم وەسفی بکەم بەس ئەوەندە دەڵێم کۆڵەکەی ماڵەکەم ڕووخا لەدوای مەرگی لەناکاوی هاوژین.
ئەوەندە ماوە بڵێم هاوژینی جوانەمەرگ ئەندام چالاکی یەکیەتیی ژنان و بەرپرسی کۆمیتەی ڕانیە لە باشووری کوردستان بوو هەر ئەرکێکی پێی سپێردرابا بێ باکانە جێبەجێی دەکرد بەداخەوە مەرگ ڕێگەی نەدا کە بگات بە ئاوات و ئارەزوەکانی و لە تەمەنێکی کەم بەرووداوێکی دڵتەزێن کۆچی دوایی کرد چەندین ئاواتی جوانی لەگەڵ خۆی بردە ژێرگڵ، ئێستا وا ساڵێک بەسەر کۆچی دوایی تێدەپەرێت و جێگەی زۆر دیارە لە نێوکۆری هاوڕێ و خزماندا .
هیوادەرم کچانی کورد بتوانن ئاورێک لە ژیانی ئەو کچە ئازایانە بدەنەوە کە تا مردنیان بوێرانە ژیان و کچ بوون و ژن بوونی خۆیان خۆشویست و بوونە مێژوویەکی جوان.
ئەو بابوتە بە کەمێک تەئخیرەوە بەبۆنەی ساڵڕۆژی لەدەستدانی هاوژینی جوانەمەرگ لە گۆڤاری ٦٢ی “ژنان”دا بڵاو بووەتەوە
