ڕۆژی شەممە ڕێکەوتی ٣١.٥.٢٠٢٥ لە شاری فرانکفۆرتی ئاڵمان کۆنگرەی نەتەوەکانی ئیرانی فیدراڵ گیرا. لەو کۆنگرەیەدا هەیئەتێکی کۆمیتەی ئاڵمانی یەکیەتی ژنانی دێموکراتی کوردستانی ئێران بە سەرپەرشتی شەهین مورتەزازادە بەرپرسی بەشی تەشکیلات و نەرمین عوسمانی بەرپرسی بەشی پەیوەندیەکانی ئەو رێکخراوە بەشدار بوون.
سەرەتای بەرنامەکانی کۆنگرە بە ڕاگرتنی خولەکێک بێدەنگی بۆ رێزگرتن لە گیانی پاکی شەهیدانی ڕێگای ئازادی دەستی پێکرد. دواتر لە لایەن ئاسۆ ساڵح ئەندامی هەئیەتی ئامادەکاری کۆنگرەی نەتەوەکانی ئێرانی فیدڕاڵ کردنەوەی پانیلی یەکەم راگەیاندرا و بە وتەکانی بەرێز مستەفا هیجری سکرتێری گشتی حیزبی دیموکراتی کوردستانی ئیران دەستی پێکرد.
بەرێز هیجری لە باسەکەی خۆیدا ئاماژەی بە دۆخی هەنوکەیی رۆژهەڵاتی ناڤین و ئێرانی کرد و لەو پەیوەندییەدا وشیاری نەتەوەیی خەڵکی لە هەرێمە نەتەوەییەکانی ئێران و گرینگیدان بە رێکخستنی بە هێزی سەرەکی لەدژی رێژیم ئیسلامی ئێران و سیاسەتی سەرکوتی ئەو رێژیمە دژ بە نەتەوە نا فارسەکان و لە راستای بنیاتنانی ئێرانێکی ئازاد و دێموکرات وەسف کرد.
دواتر نوێنەرانی تری ئەحزابی سیاسی سەربە نەتەوە نا فارسەکانی ئێران بابەتەكانی خۆیان پێشکەش کرد.
جێگای ئاماژەیە کە ریزبەندی بەرنامەکانی کۆنگرەی نوێی نەتەوەکانی ئێرانی فیدراڵ لە سێ پانێلی جیاوازدا بەڕێوەچوون کە یەکێک لە پانێلەکان تایبەت بوو بە پرسی ژنان و کاریگەریان لە شۆڕشی ژینا دا.
