ڕێکەوتی ١٢ ـ ٠٧ ـ ٢٠٢٥ی زائینی بەشێکی بەرچاو لە ئەندامانی یەکیەتیی ژنانی دێموکرات و دەستەی بەڕێوەبەری یەکیەتیی ژنان لە وڵاتی سوئێد وەک ئەرکێکی نیشتمانی و نەتەوەیی بەشداریان لە یادی ٣٦ ساڵەی بە ناحەق شەهیدکرانی دوکتور عەبدولڕەحمان قاسملوو و کاک عەبوڵڵا قادری ئازەر لە شاری ستۆکهۆڵم لە وڵاتی سوئێد کرد.
شایانی باسە کە بەشێکی بەرچاو لە ڕێڕەوانی شەهیدی نەمر دوکتور قاسملوو، هەروەها چەندین نوێنەری حیزب و لایەنە سیاسییەکانی کوردستان بەشداریان لەو کۆڕیادە دا کرد.
لە یادی ٣٦ ساڵەی تیرۆری ناجوانمێرانەی شەهید دوکتور قاسملوو دا چەند کەسایەتی وتار و پەیامیان لە سەر شەهید دوکتور قاسملوو وەک سیاسییکار، ئابووری زان، کۆمەڵناس و دیپلۆمات و پێشمەرگە و سکرتێری حیزبی دێموکراتی کوردستانی ئێران پێشکەش کرد.
کاک ”نەبەز عەلیدووست” بەرپرسی کۆمیتەی گشتی حیزبی دێموکراتی کوردستان لە وڵاتی سوئێد، چەند وتەیەکی سەبارەت بەم سمینارە و ڕۆڵی شەهید دوکتور قاسملوو پێشکەش کرد.
پەیامی دەستەی کارگێری حدکا لە لایەن خاتوو ”نیشتمان عەزیزی” ئەندامی کۆمیتەی بەڕێوەبەری سوئێد خوێندرایەوە.
”فرێدریک مالم” ئەندام پارلەمانی حیزبی لیبراڵی سوئێد و “کادر کەسیرگە” ئەندام پارلمانی حیزبی سوسیال دێموکراتی سوئێد
پەیامی خۆیان بە نوێنەرایەتی لە حیزبی لیبراڵ و سوسیال دێموکرات لە سوئێد پێشکەش کرد.
کاک “بێهروز کورد ئەحمەدی” چەند هۆنراوەیەکی لە وەسفی شەهید دوکتور قاسملوو دا پێشکەش کردن.
بەڕێز کاک “مستەفا شەڵماشی” یاری دێرینی شەهید دوکتور قاسملوو و ئەندامی پێشووی دەفتەری سیاسی حدکا، دوکتور “ئیدریس ئەحمەدی” مامۆستای زانکۆ و لێکۆلەرو چاوەدێری سیاسی, کاک “سۆران عەلیپوور” قوتابی بە ئەمەگی شەهید دوکتور قاسملوو، هەرکام بەنۆبە وتارێکی پڕ نێوەرۆکیان سەبارەت بە کەسایەتی دوکتور قاسملوو پشکەش کرد.
سمیناری یادی ٣٦ ساڵەی شەهید بوونی دوکتور قاسملوو دەرفەتێک بوو بۆ ئەوەی لە نزیکەوە لەگەڵ چەندین کەسایەتی بەشدار بووی ئەو سمینارە دیدار بکەین و هاوکاتیش پەیمان نوێ کردنەوە بوو، لەگەڵ شەهید دوکتور قاسملوو، ئەو مرۆڤەی کە هەوڵی دابین کردنی عەداڵەتی کۆمەڵایەتی و یەکسانی لە کۆمەڵگەی کوردستان و ئێرانی دەدا و بەداخەوە بۆ دابین کردنی عەداڵەتی کۆمەڵایەتی و مافەکانی گەلی کورد بە دەستی تیرۆریستانی ڕژێمی ئێران لە سەر مێزی وتووێژ لە ٢٢ی پووشپەڕی ١٣٦٨ی هەتاوی لە ویەن پایتەختی وڵاتی ئوتریش لەگەڵ کاک عەبدوڵلا قادری ئازەر و کاک دوکتور فازڵ ڕەسووڵ دۆستی حیزب تیرۆر و شەهید کران.
یەکیەتیی ژنانی دێموکراتی کوردستانی ئێران کۆمیتەی سوئێد
١٢-٠٧-٢٠٢٥ زائینی
