ڕێکەوتی ٠٤-٠٦-٢٠٢٥ ڕێکخراوەکانی ژنانی سوئێد Kvinnoorganisationer لەگەڵ تۆڕی هاوپەیوەندی integrationsnätverket لە پارلەمانی وڵاتی سوئێد بە بەشداری بەشێکی بەرچاو لە ئەندامانی سێمینارێکیان بەڕێوەبرد.
مەبەستی پێکهێنانی ئەو سێمینارە پێشکەشکردنی ڕاپۆرتێک بوو بە ناوی “ئەزموونی ژنان سەبارەت بە ڕەگەزپەرستی لە وڵاتی سوئێد”.
سێمینارەکە بە دەستپێشخەریی ئەندامانی پەرلەمان هێلێنا ڤیلهێلمسۆن نوێنەری سێنتەر پارتی و سۆفیا ئەملۆ نوێنەری سوسیال دێموکراتەکان ڕێکخرابوو.
ڕاپۆرتەکە شیکارییەکی ڕەگەزی سەبارەت بە ڕاپۆرتەکانی حکومەت بۆ لیژنەی نەتەوە یەکگرتووەکان دژی هەڵاواردنی ڕەگەزی (CERD) و پلانی کارکردن دژی ڕەگەزپەرستی و تاوانەکانی ڕق و کینە بوو.
لە ڕاپۆرتەکە دا تیشک خرابوو سەر ئەوە کە چۆن ژنان بە شێوازی تایبەت کاریگەری ڕەگەزپەرستییان لەسەرە، لەوانە لە ڕێگەی ڕەگەزپەرستی سێکسی، جیاوازی دانان، بەتایبەتی بۆ پەیوەندی گرتن لەگەڵ دام و دەستگای پەیوەندیدار و دەسەڵاتدار و هەروەها جیاوازی کردن لە باری پاراستن و پشتیوانی کردن لەو کەسانەی بە شێوەی جۆراوجۆر تاوانی ڕەگەزیان بەرامبەر دەکرێ.
پێویست بە ئاماژەیە کە خاتوو ڕێناس خزری، بەنوێنەرایەتی یەکیەتیی ژنانی دێموکرات، وتارێکی پێشکەش کرد و هەروەها لە لایەن ڕێکخراوەکانی ژنان لە سوئێد داوا کرابوو کە یەکیەتیی ژنانی دێموکرات پێشەکی ڕاپۆرتەکە بنووسێ کە خاتوو ڕێناس ئەو ئەرکەی وەئەستۆ گرتبوو.
لە ڕاپۆرتەکە دا بە تایبەتی تیشک خرابوو سەر گرنگی دیارکردنی دەنگی ژنان لە کارەکانی دژ بە ڕەگەزپەرستیدا و جەختی لە پەیوەندی نێوان ڕەگەز و نەتەوە و دەسەڵات کردبوو.
پانێڵستەکان بریتی بوون لە:
- لوول جەما، بەڕێوەبەری کارەکان و دامەزرێنەری کۆمپانیای ئێکسیستێرا
- یۆهانا تیادەر، بەڕێوەبەری پڕۆژەی یەکسانی جێندەری و توندوتیژی دژی ژنانی سامی لە پەرلەمانی سامی
- ئەلیزابێت کالیبی، شارەزا لە دامەزراندنی ژنانی لەدایکبووی وڵاتانی دی لە بازاڕی کاردا
ڕاپۆرتەکە چەند ڕاسپاردەیەکی تێدایە بۆ حکومەت کە بریتین لەو خاڵانە: - هەوڵدان دژی ڕەگەزپەرستی دیجیتاڵی و سێکسی
- ڕێوشوێنی تایبەت بۆ ژنان لە کەمینە نەتەوەییەکان
- بەهێزکردنی هاوکاری لەگەڵ کۆمەڵگەی مەدەنی
بەگشتی لە سێمینارەکە دا جەخت لەسەر پێویستی تێکەڵکردنی ڕوانگەی یەکسانی و جێندەری لە کاری دژە ڕەگەزپەرستیدا – کرابوو، پرسێکی گرینگ کە لە پلانی کارکردنی ئێستای حکومەتدا نەماوە.
یەکیەتیی ژنانی دێموکراتی کوردستانی ئێران کۆمیتەی سوئێد
