ئۆسلۆ – ٢٠ی مارسی ٢٠٢٦
بە بۆنەی ھاتنی جەژنی نەورۆز، چالاکییەکی بەشکۆ لە ژێر ناونیشانی «نەورۆز ھێمای یەکگرتوویی کورد و کوردستانە» لە شاری ئۆسلۆ، پێتەختی وڵاتی نۆروێژ، بەڕێوەچوو. ئەم چالاکییە لە لایەن ڕێکخراوە مەدەنییەکانی کوردی دیاسپۆرای چواربەشی کوردستانی نیشتەجێی نۆروێژەوە ڕێکخرا و بە بەشداریی سەدان کورد بە جل و بەرگی نەتەوایەتی و ئاڵای کوردستان بەرز ڕاگیرا.
بەرنامەکە لە کاتژمێر ١٦:٣٠ لە تەنیشت وێستگەی شەمەنەفەری (Trafikanten) دەستی پێکرد و بە ڕێپێوانێک بەرەو ناوچەی (Spikersuppa) بە دروشمی نیشتمانی بەڕێوەچوو. لە کاتژمێر ١٧:٣٠، بەرنامەی سەرەکی لە لایەن دوو کیژ بە ناوەکانی شانیا و ڕووزەرین پێشکەش کرا.
لە بەرنامەکەدا، سروودی نەتەوایەتی «ئەی ڕەقیب» خوێندرا، خولەکێک بێدەنگی بۆ یادی شەھیدانی کوردستان ڕاگێڕدرا، و ھەروەھا چەندین بەش بە پەیام، گۆرانی، شیعر و ھەڵپەڕکێ تەرخان کرا. لە بڕگەیەکی دیکەدا، ئاگری نەورۆز بە بەشداریی ژنان، پیاوان و گەنجانی کورد و ھەندێک لە پەرلەمانتارانی نۆروێژی داگیرسا.
بەرنامەکە بە گۆرانی و ھەڵپەڕکێ کۆتایی ھات. یەکیەتیی ژنانی دیموکراتی کوردستانی ئێران لە نۆروێژ یەکێک بوو لە ڕێکخەرانی سەرەکی ئەم چالاکییە.
لە ڕۆژی دواتر، ٢١ی مارسی ٢٠٢٦، چالاکییەکی تر بە بۆنەی نەورۆز لە لایەن یەکیەتیی ژنانی دیموکراتی کوردستانی ئێران و کۆمەڵەی کولتووری «ڕۆمەریکەی خواروو» لە ساڵۆنی شەسموکووشە بەڕێوەچوو.
لە سەرەتای بەرنامەکەدا، خاتوو شانیا بەخێرھاتنی بەشداران کرد، پاشان سروودی «ئەی ڕەقیب» و خولەکێک بێدەنگی بۆ گیانی شەھیدان پێشکەش کرا. ھەروەھا، پەیامێکی ھاوبەش لەلایەن خاتوو بێری مەرەسەنە خوێندرایەوە.
ئەو بەرنامەیە بە گۆرانی، موزیک و ھەڵپەڕکێ تا درەنگانی شەو بەردەوام بوو و بە شێوەیەکی گەرم و خۆش کۆتایی ھات.
