بەڕێوەچوونی فێستیڤاڵی ساڵانەی یەکیەتیی ژنانی دێموکراتی کوردستان لە سوید!
ڕۆژی شەممە 2022/08/06 زایینی، کۆمیتەی سویدی یەکیەتیی ژنانی دێموکراتی کوردستان، فێستیڤاڵێکی یەک ڕۆژە و هەمەڕەنگی بە بەشداری بەشێک لە ئەندامان و بنەماڵەکانیان لە شاری “لینشۆپینگ”ی وڵاتی سوید بەڕێوە برد.
سەرەتا خاتوو “لەتیفە جەباری” بەرپرسی کۆمیتەی سوید، بەخێرهاتنی بەشداران و میوانانی کرد و پاشان ڕیزی بەرنامەکان و ڕێڕەوی کاری فێستیڤاڵەکەی پێشکەش کرد.
بڕگەی یەکەمی فێستیڤاڵەکە تەرخان کرابوو بۆ تەندروستی لەش و مێشک. لەو بەشەدا خاتوو “ڕێژاو” نووسەر، ڕاهێنەری یۆگا، بۆکس و بەرگری تاکە کەسی، باسێکی کورتی لەسەر تەندروستی پێشکەش کرد و پاشان بە پێشاندانی چەندین جووڵەی بەسوود بۆ لەش و بەتایبەتی بۆ ژنان و هەروەها یوگا کردن، درێژەی بە باسەکەی دا و بەشدار بووانیش چالاکانە و بە تێکڕا بەشداری ڕاهێنانەکانیان کرد.
لە بەشێکی دیکەی فێستیڤاڵەکەدا خاتوو “ئێوا لیند” ئەندام پارلمانی سوید لە سەر لیستی سوسیال دێموکرات لە باسێکدا تیشکی خستە سەر بارودۆخی کۆمەڵگەی سوید و ئەو بوارانەی کە سوسیال دێموکرات هەوڵی چاکسازییان بۆ دەدات و بەشداران چالاکانە لە باسەکاندا بەشدارییان کرد و نیگەرانی خۆیان لە هەمبەر سیاسەتی دەرەوەی وڵاتی سوید بەرانبەر بە ئێران و تورکیا دەربڕی و پرسیار و تێبینییەکانی خۆیان لەو پێوەندییەدا هێنایە گۆڕێ و خاتوو “ئێوا لیند” بەڵێنی دا کە پرسیار و تێبینییەکانیان لە کۆبوونەوەی خۆیاندا و لە گەڵ بەرپرسانی سەرەوە باس بکات.
بڕگەیەکی دیکەی فێستیڤاڵ وەک هەمیشە تەرخان کرابوو بۆ منداڵان و پێک هاتبوو لە چەند بەش، وەک خوێندنەوەی کتێب، گەڕان بە نێو دارستاندا و چەند یاری منداڵانە، کە لە لایەن منداڵانەوە پێشوازی گەرمی لێکرا.
پێویستە بگوترێ کە لەو بەشەدا زیاتر تیشک خرابووە سەر سروشت و چۆنیەتیی پاراستنی ژینگە و سەوزایی، کە منداڵان بە کۆکردنەوەی پاشماوە فڕێ دراوەکانی دەور و بەریان بە کردەوە لەو بوارەدا ڕاهێنانیان کرد و پاشان دیارییان بەسەردا دابەش کرا.
لە بەشێکی دیکەی فێستیڤاڵەکەدا و دوای خواردنی نانی نیوەڕۆ، هاوڕێیان بە سازکردنی خواردنی کوردەواری، گۆرانی، قسەی خۆش و گێڕانەوەی بیرەوەری و هەڵپەڕکێ تا درەنگانی ئێوارە کۆڕەکەیان ڕازاندەوە.
بەرنامەکە تا کاتژمێر 7ی ئێوارە درێژەی هەبوو و پاشان ئەندامان سپاس و پێزانینی خۆیان بۆ پێکهێنانی ئەو ڕۆژە خۆشە، پێشکەش بە کۆمیتە کرد و بەرەو شوێنی نیشتەجێ بوونیان گەڕانەوە.
یەکیەتیی ژنانی دێموکراتی کوردستان- سوید
