رۆژی شەممە، ٢٠٢٥/١١/١ کاتژمێر ١٢ بۆ ٤ی دوانیوەڕۆ لە شاری لیلەسترۆیم لە وڵاتی نۆروێژ، فێستیڤاڵێکی کولتووریی نەتەوە جیاوازەکان لە ژێر ناوی کولتوورمیکس لە ھۆڵی کولتووریی لیلەسترۆیم بەڕێوەچوو. ئەم ساڵیش وەک ساڵانی تر یەکیەتیی ژنانی دیموکراتی کوردستانی ئێران لە نۆروێژ و یەکیەتیی ژنانی دەرەوەی وڵات بەشدارییان تێدا کرد.
کولتوورمیکس ڕێوڕەسمێکی ساڵانەیە کە لە وڵاتی نۆروێژ بەڕێوەدەچێ و ژمارەیەکی بەرچاو لە نەتەوە جیاوازەکانی وەک نۆروێژی، کورد، پاکستانی، عەرەب ، ئێریتێریایی، سوودانی، ئۆکراینی، سریلانکایی، ڤێتنامی، ئەڤغانی و تێیدا بەشداری دەکەن. مەبەست لە بەڕێوەبردنی ئەم شێوە بەرنامانە لە لایەن شارەوانیی لیلەسترۆیمەوە، ئاشنا کردنی نەتەوە جیاوازەکانی ئەو وڵاتەیە بە کولتوور و ھونەر، جلوبەرگ و خواردن و بەھا گرینگەکانی یەکدی. نۆروێژییەکان جگە لە ھاوکاری بۆ بەڕێوەبردنی بەرنامەکە، خواردنی کولتووری تایبەتیی خۆیان ھێنابوو و لە ڕیزی بەرھەمی نەتەوەکانی دیکەدا دایان نابوو.
ئەمساڵیش وەک ساڵانی پێشوو کۆمیتەکانی یەکیەتیی ژنانی دیموکراتی کوردستانی ئێران لە وڵاتی نۆروێژ و کۆمیتەی ژنانی دەرەوەی وڵات بە خواردن و پۆشینی جلوبەرگی کوردی، بەشدارییان کرد. وێڕای ئەندامانی یەکیەتیی ژنان، ژمارەیەکی بەرچاو لە کوردانی دانیشتووی ئەو ناوچەیە و دەورووبەری، بە جلوبەرگی کوردییەوە ئامادە بوون. بە گشتی بەرنامەکە جێی رەزامەندی و خۆشحاڵیی بەشداران بوو. بەشداران ھیوایان خواست کە ئەم بەرنامەیە لە پێناوی ھەرچی زیاتری یەکترناسینی نەتەوە و کولتوورە جیاوازەکان بە یەک، لە ساڵانی داھاتوودا درێژەی ھەبێ. بەرنامەکە بە مووزیک و ھەڵپەڕکێی کوردی کۆتایی ھات.
یەکیەتیی ژنانی دیموکراتی کوردستانی ئێران لە نۆروێژ و یەکیەتیی ژنانی دەرەوەی وڵات
٢٠٢٥/١١/١
