ئێران ڕەشیدی
ڕۆژی جیهانیی ٢٥ی نۆڤامبر لە ڕۆژی ١٧ی ئۆکتۆبەری ساڵی ١٩٩١ لە لایەن ڕێکخراوی نەتەوە یەکگرتووەکانەوە واژۆ کرا.
ئەویش هۆکارەکەی دەگەڕێتەوە بۆ کوژرانی سێ خوشک، بەناوی خوشکانی میراباڵ، سێ چالاکی سیاسیی کە لە ڕێی چالاکی دژی سیاسەتی ئەو سەردەمە لە وڵاتی کۆماری دۆمینیکان بە دەستی حکوومەتی دیکتاتۆریی تراخیلۆ ناجوامێرانە تیرۆر کران.
لەو کاتەوە هەموو ساڵێک لە هەموو وڵاتانی دنیا، چالاکییە سیاسی و مەدەنی و مافی مرۆڤییەکان لە ماوەی ١٦ ڕۆژی پڕتەقاڵیدا بۆ بەرەنگاربوونەوەی توندوتیژی دژی ژنان، یادی ئەو ڕۆژە بەرز ڕادەگرن. لە هەموو بوارە جۆراوجۆرەکاندا چالاکی دەکەن و خەباتی خوشکانی میراباڵ بووەتە سیمبۆلی جیهانی دژی زوڵم و نادادپەروەریی سیستماتیکی حکوومەت.
ئەرکی ڕێکخراوەکان، بەتایبەت ڕێکخراوەکانی ژنان، ئەوەیە داکۆکی لە مافی ژنان بکەن.
هۆشیارکردنەوە و ئاگاییپێدانی ژنان لە هەموو بوارەکاندایە. ئەگەر ژنان هەوڵ بدەن بۆ ئاشنابوون بە مافە ڕەواکانی خۆیان، ئەوا دەتوانن بە باوەڕبەخۆبوونەوە سەربەخۆیی فیکری بەدەست بێنن و تەواوی کۆسپەکانی سەر ڕێیان تێپەڕێنن و بێنە نێو گۆڕەپانی سیاسی و کۆمەڵایەتییەوە. ئەوکاتە هەوڵ بدەن بۆ پەروەردە و خوێندن کە مافی خۆیانە و هەروەها کاریگەریی ئەرێنی لەسەر ژیانی خێزانی و پەروەردەکردنی منداڵەکانیان لەنێو کۆمەڵگەدا دابنێن.
پەروەردە پلیکانی ڕزگاری و بەهێزکردنی ژنانە.
٢٥ی نۆڤامبری هەموو ساڵێک دەرفەتێکە بۆ بیرکردنەوە لە پێگەی ژنان لە کۆمەڵگەدا و وەبیرهێنانەوەی ئەو ڕاستییە تاڵەیە کە توندوتیژی دژی ژنان هێشتا یەکێکە لە بەربڵاوترین و شاراوەترین پێشێلکارییەکانی مافی مرۆڤ لە جیهاندا.
ئەم ڕۆژە تەنیا بۆنەیەکی ساڵنامەیی نییە، بەڵکوو بانگەوازێکی جدییە بۆ هەموومان کە هەنگاو بنێین بەرەو بنیاتنانی کۆمەڵگەیەکی سەڵامەتتر و یەکسانتر و مرۆڤدۆستتر.
توندوتیژی دژی ژنان تەنیا بە مانای زیانگەیاندن بە جەستە نییە، هەروەها توندوتیژیی دەروونی، ئابووری، کۆمەڵایەتی و کولتوری لە خۆ دەگرێت. ئەو ئەزموونانەی ڕۆژانە ڕووبەڕووی زۆرێک لە ژنان دەبنەوە، کاریگەرییەکی بێدەنگ بەڵام قووڵیان لەسەر ژیانی تاک و خێزان و کۆمەڵگەش هەیە.
لەم جۆرە هەلومەرجەدا ئەرکی ئێمە ـ وەک تاکی کۆمەڵگە و بەتایبەتی دامودەزگاکانی کۆمەڵگەی مەدەنی ـ ئەوەیە کە دەنگی ئەو ژنانە بین کە دەرفەتی دەربڕینی ئازارەکانیان نییە، بۆ ئەوانەی بە هیوای ئاسایش و دادپەروەری بە بێدەنگی دەژین.
هەر تاکێک مافی سروشتیی خۆیەتی بۆ بنیاتنانی داهاتوویەکی باشتر و کۆمەڵگەیەکی پێشکەوتووتر.
ڕۆڵی ژنانی کورد لە بزووتنەوەی ژینا و لەژێر دروشمی ژن_ژیان_ئازادی لە شارەکانی ڕۆژهەڵاتی کوردستاندا:
ژنان بە باوەڕمەندییەکی قووڵ و هۆشیاریی سیاسییەوە کۆت و زنجیری ستەم و مافە زەوتکراوەکانیان پچڕاند.
ژنانی کورد چ لە سەردەمی پاشایەتیی پەهلەوی و چ لە ماوەی زیاتر لە چل ساڵ حوکمڕانیی کۆماری بەناو ئیسلامیی کۆنەپەرست و جینایەتکاردا، سەلماندیان کە بێدەنگ نابن.
بە هێز و یەکگرتوویی توانیان کۆمەڵگەی جیهانی بهەژێنن و درێژەدەری ڕێی ژنانی ئازادیخواز بن کە ئازایانە و بوێرانە بۆ بەدەستهێنانی مافە سروشتییەکانی خۆیان و مافە نەتەوایەتییەکانیان بێدەنگ و بێهەڵوێست نەبوون و لەم ڕێیەشدا قوربانییان داوە.
ژنانی تێگەیشتوو ڕۆژ لەدوای ڕۆژ بۆ پێگەیاندنی خۆیان لە ڕێکخراوە مەدەنییەکاندا چالاکتر دەبن و خاوەندارێتی لە کەرامەتی مرۆیی و دادپەروەری دەکەن.
٢٥ی نۆڤامبر بیرهێنانەوەی ئەو ڕاستییەیە کە ئاشتی و ئاسایش و کەرامەتی ژنان مەرجی بنەڕەتین بۆ پێشکەوتنی هەر کۆمەڵگەیەکە.
با پێکەوە کار بکەین و هەنگاو بنێین بۆ ئەوەی جیهان ببێتە شوێنێکی سەلامەتتر و گەشاوەتر بۆ ژنان و لە ئەنجامدا بۆ هەموو مرۆڤەکان.
