ڕۆژی سێشەممە ڕێکەوتی ٢٢ی نوامبری ٢٠٢٢ی زایینی و یەکەم ڕۆژی کۆنگرەی ٢٢ی ژنانی سوسیالیست ئینتێرناسیۆناڵ بە وتەکانی خاتوو “وەفا حاجی” سەرۆکی پێشووی ڕێکخراوەکە و “پێدرؤ سانچێز” سەرۆک وەزیرانی سپانیا و سەرۆکی پارتی پێسۆیی سپانیا (پارتی سوسیالیستی کرێکاران) دەستی بە کارەکانی خۆی کرد.
هەردوو بەڕێزان لە وتەکانیاندا پێداگرییان لە سەر بردنە سەری ڕێژەی بەشداری ژنان لە پرۆسەی بڕیاردانی سیاسیدا کرد و “پێدرۆ سانچێز” کابینەی دەوڵەتی سپانیای وەک نموونە هێنایەوە کە ٦٠ لەسەدی لە ژنان پێک هاتووە و ئەوەشی وەک دەسکەوتێکی گرینگی کابینەکەی باس کرد.
ڕۆژی یەکەمی کونگرە لە دوو پانێلی سەرەکی پێک هاتبوو.
پانێلی یەکەم سەبارەت بە چۆنیەتی بەرەنگار بوونەوە لەگەڵ توندوتیژی ڕەگەزی بوو.
لەو پانێلەدا بەڕێزان “ئاندرێا فێرناندێز” لە لایەن حیزبی پێسۆیی سپانیا، “شانتال کامبیوا” جێگری سەرۆکی پێشووی سوسیالیست ئینتێرناسیۆناڵ و سەرۆکی بەرەی دێموکراتیکی سوسیالیستی کامێرۆن و “هێلا بن یوسف” جێگری سەرۆکی ڕێکخراوەی ژنانی سوسیالیست ئینتێرناسیۆناڵ و نوێنەری بەرەی دێموکراتیکی کار و ئازادی توونێس و گوڵاڵە شەرەفکەندی لە لایەن یەکیەتیی ژنانی دێموکراتی کوردستانی ئێران ەوە بەشدار بوون.
هاوڕێ گۆڵاڵە شەرەفکەندی لە وتەکانیدا ئاماژەیەکی چڕ و پڕی بە چۆنیەتیی سەرهەڵدان و دروست بوونی شۆڕشی ژینا، سەرکوت و کۆشتاری خەڵک لە لایەن ڕێژیمی کۆماری ئیسلامی یەوە کرد و داوای لە کۆڕ و کۆمەڵەی نێودەوڵەتی بۆ کۆتایی هێنان بە پشتیوانیکردن لە کۆماری ئیسلامی و فشار هێنان بۆ ئەو ڕێژیمە و کۆتایی هێنان بە هەموو چەشنە دانوستان و هەروەها فرۆشتنی چەک بەو رێژیمە کرد.
خاتوو گۆڵاڵە باسەکەی خۆی بە دروشمی ژن، ژیان، ئازادی کۆتایی پێ هێنا و سەرجەم بەشدارانی کۆنگرە ئەو دروشمەیان بە هەر سێ زمانی کوردی، ئینگلیزی و فارسی دووپات کردەوە.
پانێلی دووهەمی یەکەم ڕۆژ تەرخان کرابوو بۆ باس لە سەر تەندروستی مافی کچان و ژنان لە تەواوی دەورانی باروەری لە هەموو وڵاتانی جیهان و ئەو مافانەی کە دەتوانێ لە باری یاساییەوە یارمەتیدەری ژنان بێت و دەرفەتی دەست پێڕاگەیشتنی ژنان بە کەرەستەی پێویست و سیستەمی تەندروستی لەو بوارەدا دەستەبەر بکات.
لەو پانێلەدا “ژانێت کامیلۆ” وەزیری پێشووی ژنان لە کۆماری دۆمێنیکەن و سەرۆکی نوێی ژنانی سوسیالیست ئینتێرناسیۆناڵ ئاماژەی بە ئەزموونەکانی وڵاتەکەی خۆی کرد وهێندێک لێکۆڵینەوە و ئاماری نێودەوڵەتی لەو پێوەندییەدا پێشکەش کرد.
لەو پانێلەدا هەروەها “کریستی مورئال” جێگری سەرۆکی ژنانی سوسیالیست ئینتێرناسیۆناڵ و جێگری سەرۆکی حیزبی سوسیالیستی بلژیک و “لائورا بێریا” وتەبێژی گرووپی سوسیالیستی پارلمانی سپانیا باسەکانی خۆیان پێشکەش کرد.
جێگای ئاماژەیە کە ئەو باسانە لە دوو لایەنی یاسایی و تەندروستی یەوە تاوتوێ دەکران و وڵاتە جیاوازەکان ئەزموونەکانی خۆیان لەگەڵ یەکتر دابەش دەکرد. پێویست بە ئاماژەیە کە لە لایەن هەیئەتی نوێنەرایەتی یەکیەتیی ژنانەوە وێنەی “ژینا” کە بە دروشمی ژن، ژیان، ئازادی بە چەند زمانی زیندوو نەخشێندرابوو لە بەرۆکی بەشدار بووان و بە تایبەتی سەرۆک وەزیرانی سپانیا “پێدرۆ سانچێز” درا. لە کۆتا بەشی کردنەوەی کۆنگرە لە لایەن سەرۆک وەزیرانەوە، هەموو بەشدار بووان بە بەرز کردنەوەی پۆستەری “ژینا” کە لە لایەن هەیئەتی نوێنەرایەتی یەکیەتیی ژنانەوە بە سەر بەشداربوواندا دابەش کرابوو و گرتنی وێنەی بە کۆمەڵ پشتیوانی خۆیان لە شۆڕشی نوێی گەلانی ئێران دەربڕی
