لە گێڕانەوەی شاهیدحاڵێکەوە:
لە مێژووی هەر گەلێکدا ساتەوەختگەلێک هەن کە کات دەوەستێت و ترس دەبێتە تاقە هاوڕێی مرۆڤەکان. ئێوارەی پێنجشەممە، ١٨ی بەفرانبار، یەکێک بوو لەو کاتە تاریکانە. سەعات ٥ی ئێوارە، کاتێک تیشکی ئینتەرنێت کوژایەوە، کەس نەیدەزانی ئەمە سەرەتای دابڕانێکی گەورەیە. تەنیا سێ سەعات دواتر، پەیوەندییە تەلەفۆنییەکانی نێوان شارەکانیش پچڕان و بۆ ماوەی دوو شەو و دوو ڕۆژ، بێدەنگییەکی سامناک باڵی بەسەر هەموواندا کێشا.
ئەو پچڕانە تەنیا نەمانی ئینتەرنێت نەبوو، بەڵکوو دەستپێکی دڵەڕاوکێیەکی کوشندە بوو دەربارەی ئەوەی ئاخۆ چی بەسەر خەڵکدا دێت؟ یەکەم چەخماخەی ناخۆشی، ئێوارەی هەینی لە پەیوەندییەکی کورتدا لەگەڵ هاوڕێیەکمان لە تاران ڕوویدا؛ هەواڵەکان دڵتەزێن بوون: شار شێواوە، ئۆتۆمبێلەکان دەسووتێنرێن و کارەساتبارتر لە هەمووی، هەواڵی شەهیدکردنی یەکێک لە خزمەکانیان بوو کە تازە ببووە باوک و بە فیشەکی ڕاستەوخۆ بۆ سەری، ژیانی لێ ئەستێندرابوو.
ڕۆژی شەممە، کاتێک سێ ڕۆژ بەسەر بایکۆتی زانیاریدا تێپەڕیبوو، تەمومژی ترس لە هەموو لایەک چڕتر بووەوە. لە نۆرەی نانەواخانەیەکی شاری بۆکاندا، هەواڵی شەهیدبوونی “سیاوەش شیرزاد” لە تاران، وەک بروسکە لە ناو خەڵکدا بڵاوبووەوە. زۆری نەخایاند شار پڕ بوو لە هەواڵی ناخۆش؛ دەنگۆی کۆمەڵکوژیی دڕندانە لە کرماشان، مەلەکشا، ئیلام، خوزستان، مەشھەد و تاران، ترسێکی قووڵی خستبووە نێو دڵی هاووڵاتییان. شەقامەکان چۆڵ بوون و هاتووچۆ کەم بووەوە؛ هەمووان لە ماڵەکانیاندا لەبەردەم شاشەی تەلەفزیۆنەکاندا چاوەڕێی هەواڵێکی ڕوون بوون.
لەلایەکی تریشەوە، هێزەکانی ڕێژیم و بەسیجییەکان بە شێوەیەکی دڕندانە هەڵیانکوتایە سەر ماڵان بۆ کۆکردنەوەی ئامێرەکانی وەرگرتنی سەتەلایت (ڕیسیڤەر)، تاوەکو دوایین پەنجەرەی زانیارییش بەڕووی خەڵکدا دابخەن. شەوانەش ببووە کاتی ڕاوکردنی ئازادیخوازان؛ ئەوانەی لە ڕێگەی تەلەفۆن یان تۆڕە کۆمەڵایەتییەکانەوە دەنگیان هەڵبڕیبوو، لە کاتی خەودا لە ماڵەکانیان دەردەهێنران و تا ئێستاش چارەنووسی زۆربەیان نادیارە.
لەم کەشەدا، جگە لە مەترسیی گیانی، باری ئابوورییش بووەتە بارگرانییەکی تاقەتپڕووکێن. گرانیی ڕۆژ لەدوای ڕۆژی کەلوپەلە بنەڕەتییەکانی وەک شەکر، ڕۆن و برینج، خەڵکی تەواو هەژار کردووە. لە بەرامبەر ئەم هەموو نەهامەتییەدا، حکوومەت بە واریزکردنی بڕە پارەیەکی زۆر کەم و ناچیز، سووکایەتیی بە شکۆی مرۆڤەکان کرد؛ هەنگاوێک کە تەنیا مەبەستی سەرقاڵکردنی خەڵک بوو بە کێشە ڕۆژانەکانەوە. ئەم پەستانە دەروونی و داراییە گەیشتە ئاستێک کە لە نێو کۆڵان و شەقامەکاندا، خەڵکی لەبەر بێزاری و گرانی، تووشی دەمەقاڵێ و پێکدادان دەبوون.
لەو کاتەدا کە لە جیهان دابڕابووین، هەواڵی کوشتنی کوردانی ڕۆژئاوا بە دەستی گروپەکانی سەر بە حوسیەکانی ئەحمەد شەرع، برینێکی تریان خستە سەر دڵی نەتەوەکەمان. لە نەبوونی ئینتەرنێتدا، هەندێک کەناڵی چەواشەکار بە بڵاوکردنەوەی هەواڵی درۆ، بیری خەڵکیان پتر ئاڵۆز دەکرد. ئەو دوو هەفتەیە، تەنیا بڕانی هێڵەکانی پەیوەندی نەبوو، بەڵکوو تاقیکردنەوەیەکی سەخت بوو بۆ ئیرادەی گەلێک کە لە نێوان بێدەنگی و خوێندا، بەدوای ئاسۆیەکی ڕووندا دەگەڕان.
