ڕەسووڵ سوڵتانی
پێشمەرگایەتی جوانترین و پیرۆزترین هەڵبژاردنی تاکی کوردە، ئەو کاتەی نیشتمانەکەی پێخوستی پۆستاڵی دوژمن دەبێ و میللەتەکەی لە بندەستیدا دەکەوێتە بەر هەڕەشەی نەمان و توانەوە. لە دەمەدا ئەو مرۆڤانەی هەست بە بەرپرسیارەتی دەکەن و ویژدانیان زیندووە و دەماری غیرەتیان نەمردووە، ناتوانن دانیشن و سەیری زوڵمی زۆردار و هێرش و کوشتاری داگیرکەر و مەرگی هاونیشتمانەکانیان بکەن. ئەوانە سوور دەزانن پێ دەنێنە ڕێگەی بێ گەڕانەوە بەڵام بە عیشقەوە ئەو ڕێگەیە هەڵدەبژێرن و سەر بە نیشتمان دەسپێرن.
سۆما ناسری، لە نێو کاروانی شۆڕشگێڕان و تێکۆشەرانی دێموکراتدا ئیدی ناوێکی دیار و ناسراوە، جیا لە وەرگێڕانی ڕۆمانێکی بەرز و شیرین بە ناوی «کابووس» و نووسینی کۆمەڵێک دەقی زۆر جوانی ئەدەبی کە بەداخەوە بڵاوی نەکردوونەوە، پاش ڕاپەڕینە شکۆدارەکەی ژن ژیان ئازادی، سۆما هەوڵی دا بەشێک، یان بڵێین گۆشەیەک لە جەنایەتەکانی ڕێژیم لە کوردستان لە دووتوێی کتێبێکدا بە ناوی «سوورخەڵاتان» کۆ بکاتەوە و بەڵگەمەندی بکات کە ئەو کتێبە ئێستا بووەتە دوو بەرگ و چاپ و بڵاو بوونەتەوە.
بەر لەوەی بچمە سەر زەحمەتەکانی ئەو کارە، بە پێویستی دەزانم ئاوڕێک لە گرینگییەکانی بدەمەوە.
هەر قۆناغێک بە ڕووداوەکانییەوە دواتر دەبێتە هەوێنی کۆمەڵێک لێکۆڵینەوە و توێژینەوەی ئاکادیمی. بۆ نموونە ڕاپەڕینەکەی ساڵانی چلوشەش چلوحەوت، یان جەنایەتەکانی ڕێژیم لە قاڕنێ و قەڵاتان و بە گشتی لە هەموو کوردستاندا، ئێستا نامەی ماستەر و دکتۆرایان لەسەر وەردەگیرێ و هەوێنی لێکۆڵینەوەن. لەوانەیە لەبەر چاوی ئەو کەسانەی کە هەر سروشتیان وایە گەوهەر و گرینگیی هیچ کارێک نەبینن یان ئەگەر دیتیشیان بەکەمی بگرن و بە سووک لێی بڕوانن، ئەو کارەی سۆما شتێکی ئەوتۆ نەبێ بەڵام لەبەرچاوی ئەوانەی دەزانن دیکۆمێنتی سات و قۆناغە گرینگەکان چەندە پڕ بایەخ دەبن، گرینگی و بایەخی ئەو کارە، لە ڕادە بەدەرە.
لەلایەکی دیکەشەوە بەسەرکردنەوەی ئەو بنەماڵانەیە کە یەکێک لە ئازیزە هەرە ئازیزەکانی خۆیان لە پێناوی ئازادیدا لە دەست داوە و ڕێزگرتنەوەشە لەو مەزنە مرۆڤانەی گیانی شیرینیان واتە بەرزترین سەرمایەی ژیانیان پێشکەشی بارەگای نیشتمان و ئازادی کردووە. سەرەڕای ئەوانەش ئەم کتێبە ناهێڵێ تۆزی ڕۆژگار لەو ئاوێنەیە بنیشێ کە ڕوخساری دزێو و قێزەونی ڕێژیمی پەت و سێدارەی ئیسلامی نیشان دەدا و بەڵگەیەکی هەمیشە زیندووە بۆ نەوەکانی داهاتووی گەل.
ئەم کارە ڕەنجی فەرهادی دەوێ و تەنیا عیشقی شیرینی پێشمەرگە باشاری دەکا. لە نێو ئەو هەمووە دڵەڕاوکێ و مەترسییەدا، لە نێو ئەو هەمووە کاروچالاکییەدا و لەوپەڕی بێ دەرەتانی و نەبوونی و بێ ئیمکاناتیدا تەنیا ئەڤینی پێشمەرگانە دەتوانێ تینوگوڕی وەها کارێکت پێ ببەخشێ کە هیچ پاداشتێکی ماددیشی لێ ناکەوێتەوە. لەلایەکی دیکەوە داواکردن لەم و لەو بۆ ناردنی دیکۆمێنتی باوەڕپێکراو و وردبینانە و تایپکردنەوە و یەکدەستکردنەوەی ڕێنووس و ڕێزمان و زمان و دیزاین و بەرگ و ئەوجار مشووری چاپکردن و تێچووی چاپ، هەموو ئەوانە چۆن دەکرێن ئەگەر عیشقێکی پیرۆز نەبێ؟
لێرەدایە شاعیر دەڵێ:
لە فەرهادێ مەپرسن چۆن دەکا باشاری بەردی شاخ
ئەڤینی شیرنە دەتکێ لە بەرد و دارەکەی بێستوون
