ئێران رەشیدی
پێش ئەوەی باسی ڕۆڵی ژنان لە شۆڕشی ژینادا بکەین، بە ئاوڕدانەوەیەکی خێرا لە مێژووی گەلی کورد، دەبینین ژنان لە هەموو شۆڕشەکانی کورددا ڕۆڵی دیار و بەرچاویان هەبووە و لە بڕیاردانی سیاسی بزووتنەوەی ڕزگاریخوازی دا شوێن پەنجەیان دیارە، تەنانەت چەکی ئازادیخوازی لەشانکردووە و بەرانبەر بە داگیرکارانی کوردستان و دوژمنانی کورد شەڕیان کردووە و لەم پێناوەدا گیانیان بەخشیوە و شەهیدبوون. لەم پێوەندییەدا شێرە ژنان و کچانی کوردستان بێچاوەڕوانی و خۆنەویستانە خزمەتیان کردووە، بەڵام بەداخەوە زۆربەیان بە نادیاری ماونەوە و لە مێژووی بزووتنەوەی ڕزگاریخوازیدا تۆمارنەکراون.
بەهۆی زوڵم و زۆری و بێدادییەکانی کۆماری ئیسلامی، هەڵاواردنی ڕەگەزی، توند و تیژی دەسەڵاتی کۆماری ئیسلامی بە گشتیی و ئۆرگانە سەرکوتکەرەکانی وەک گەشتی ئیرشاد و حیجابی زۆرەملێ بەتایبەتیی بەدژی کچان و ژنان، کاسەی سەبری ژنان و کچان پڕبووە و لەهەر دەرفەتێکی گونجاو کەڵک وەردەگرن. مەرگی ژینا ئەمینی، بەهۆی ئەشکەنجەی گەشتی ئیرشادەوە بوو بە دەسپێکی ناڕەزایەتیی بەرفراوانی خەڵکی شاری سەقز و خەڵکی ئەم شارە لە کاتی بەخاکسپاردنی ژینادا بۆ نیشاندانی ناڕەزایی خۆیان بەم تاوانەی کۆماری ئیسلامی هاتنە سەر شەقام و بەشداریان لە مەراسیمی بە خاکسپاردنی ژینادا کرد. بەم شێوەیە شۆڕشی ژینا لە شاری سەقزەوە بە دروشمی “ژن، ژیان ئازادی” دەستیپێکرد، سەرەتا کوردستان و دواتریش هەموو ئێرانی گرتنەوە.
بەهۆی ئەوەی کە ئەم شۆڕشە مۆرکێکی ژنانەی بەخۆیەوە گرت، هەر زوو پشتیوانی ژنانی گەلانی دیکەی دنیای بەدوای خۆیدا هێنا، زۆر کەسایەتیی ناسراو و نێوەنەتەوەیی و ئەندامانی پارلەمانی وڵاتانی ئوروپایی بە نیشانەی ناڕەزایەتیی بۆ کوشتنی ژینا پرچەکانی خۆیان بڕی و بەم هۆیەوە پشتیوانی خۆیان بۆ ئەم شۆڕشە و بۆ ژنانی کوردستان و ئێران دەربڕی. ئەم شۆڕشە هەر زوو پشتیوانی هێزە سیاسییە کوردییەکان و دواتریش لایەنەکانی دیکەی ئۆپۆزیسێۆنی ئێرانی بەدەستهێنا.
ئەم شۆڕشە لە کوردستانەوە دەستی پێکرد و بەهۆی ڕوڵی بەرچاو و پێشەنگایەتیی ژنانی مافخواز وئازادیخواز، سەرەتا بە لابردنی کەچکە و سەرپۆشەکانیان و سوتاندنیان لە مەیدانی ئەسڵی شارەکان دەستیان کرد بەڕاپەڕین و پێشەنگدارەتی ئەم شۆڕشەیان کرد. شۆڕشی ژینا زۆر زوو پەرەی ئەستاند، گەنجان و پیاوانی ئازیخواز بۆ پشتیوانی لە ژنان و کچانی نیشتیمان هاتنە دەنگ و بەدەستی بەتاڵ بەرەنگای سوپای داگیرکار، چەکدار و تەیار بە کەرەستەی سەرکوتی کۆماری ئیسلامی بوونەوە. پڕشنگی ئەم شۆڕشە هەموو ئێرانی گرتەوە و پشتیوانی زۆری خەڵکی دنیای بەدوای خۆیدا هێنا. دامودەزگا سەرکوتکارەکانی کۆماری ئیسلامی بێ بەزەییانە بەگژ خەڵکی وەزاڵەهاتوودا چوونەوە و لە هیچ تاوانێک نەپرینگانەوە، سەدان کەس لەم شۆڕشەدا سینگی خۆیان کردە قەڵغان و تێکەڵ بە کاروانی شەهیدان بوون. و لەم ڕێگایەشدا ژنان و کچان بە دەڕەندەترین ونامڕۆڤانەترین شێوە بەدەستی جەللادانی ڕژیم دەستبەسەر کران ولە ژێر ئەشکەنجە و تەنانەت دەستدرێژی جنسییدا گیانیان لە دەست دا.
شۆڕشی ژینا هەوراز و نشێوەکانی تێدەپەڕێنێ و بە کۆتایی هێنان بە دەسەڵاتی کۆماری ئیسلامی سەردەکەوێ، هەر ئەوەش ترس و لەرزی خستۆتە نێو دڵی دەسەڵاتدارانی کۆماری ئیسلامی و زۆر بێبەزەییانە بەرەنگاری شۆڕشگێران دەبنەوە.
ئەم شۆڕشە شۆڕشێکی کۆلکەزێڕینەیە بۆ ئازادی هەموو گەلانی ئێران. بەڵام ژنانی کوردستان حەفتاوحەوت ساڵە بۆ ئازادی و یەکسانی خەبات دەکەن، ئێستا هەموو ژنانی نەتەوەکانی دیکەی ئێران بوونە هاوخەباتیان بۆ ئازادی، یەکسانی و دادپەرەوەری کۆمەڵایەتیی. بۆ ئەوەی هەمووان بتوانن لە وڵاتێکی ئازاد و دێموکراتی دا پێکەوە بژین.
دیاردەیەکی بەرچاوی ئەم شۆڕشە ئەوەیە، کە دایکان و خوشکان، باوک و کەس و کاری شەهیدانی ئەم ڕاپەڕینە لە کاتی ناشتنی ئازیزانیان دا، بەڵێن بۆ بەردەوامی ئەم شۆڕشە دووبارە دەکەنەوە، خەڵکی بەشدار لەم مەراسیمانەدا بە دروشم دان و بەڵێنی بەردەوامی ئەم شۆڕشە سەرەخۆشی لەیەکدی دەکەن. کەس و کاری شەهیدانی ئەم ڕاپەڕینە لەکاتی بەخاکسپاردنی ئازیزانیان وانەکانی نیشتیمان پەروەری و خۆشەویستی نیشتیمان دەڵێنەوە. سروودی نیشتیمانی دەڵێنەوە و ئاڵای کوردستان دەشەکێننەوە، چۆپی سوری دەستی دایکان و جامانەی ملیان و جلوبەرگی لەجامانە دروستکراویان کە هێمان بۆ پێشمەرگە بوونە هێمای خۆڕاگری و یەکیەتیی نەتەوەیی و ئازادیخوازی، دژی زوڵم و ناکسانییە.
بەهیوای سەرکەوتنی شۆڕشی ژینا
