لە چوارچێوەی هەوڵە بەردەوامەکان بۆ گەیاندنی دۆسیەی پێشێلکارییەکانی مافی مرۆڤ لە ڕۆژهەڵاتی کوردستان بۆ ناوەندە نێودەوڵەتییەکان، ڕۆژی هەینی ١٧ی ژوئیەی ٢٠٢٦، کۆبوونەوەیەکی کاری و دیپلۆماسی لە نێوان خاتوو شەیدا ویجدانی، نوێنەری یەکیەتیی ژنانی دێموکراتی کوردستانی ئێران لە فەڕانسە و خاتوو ئایدا هادیزادە، ئەندامی ئەنجومەنی نیشتمانیی فەڕانسە، لە پەرلەمانی فەڕانسە لە پاریس بەڕێوەچوو.
١. پێشکەشکردنی ڕاپۆرتی یاسایی لەسەر دۆخی زیندانیانی سیاسیی ژن
لە سەرەتای دیدارەکەدا، نوێنەری یەکیەتیی ژنان چەند ڕاپۆرتێکی یاسایی و مافی مرۆڤی بە زمانی فەڕەنسی پێشکەش کرد، بە مەبەستی گەیاندنیان بۆ لایەنە پەیوەندیدارەکانی پەرلەمانی فەڕانسە.
ڕاپۆرتەکان تیشکیان خستە سەر پێشێلکاریی سیستماتیکی مافەکانی مرۆڤ، دۆخی بەندکراوانی سیاسی و توندوتیژیی دەوڵەتی دژ بە ژنان لە ڕۆژهەڵاتی کوردستان. هەروەها هۆشدارییان لەسەر مەترسیی جێبەجێکردنی حوکمی سێدارەی هەندێک لە زیندانیانی سیاسیی ژنی کورد دا، لەوانە:
* وریشە مورادی، کە سەرەڕای ئەوەی حوکمی سێدارەی بەسەردا سپێنراوە، لە مافە بنەڕەتییەکانی وەک دەستڕاگەیشتن بە پارێزەر و پەیوەندی لەگەڵ بنەماڵەکەی بێبەش کراوە.
* پەخشان عەزیزی، ڕۆژنامەنووس و چالاکوانی مەدەنی، کە حوکمی سێدارەی بەسەردا سەپێندراوە.
* زەینەب جەلالیان، کۆنترین زیندانیی سیاسیی ژن لە ئێران، کە هێشتا لەژێر گوشاردا دەژی و تەنانەت لە مافی چارەسەری پزیشکیی گونجاو بێبەشە.
١. دۆکیۆمێنتکردنی پێشێلکارییەکان لە دژی ژنان لە دوای ڕاپەڕینەکان
بەشێکی دیکەی گفتوگۆکە بۆ تاوتوێکردنی دۆخی مافی مرۆڤ دوای خۆپیشاندانەکان تەرخان کرا. لەو چوارچێوەیەدا باس لە دەستبەسەرکردنی بەکۆمەڵی ژنان، ڕاگرتنیان لە ناوەندە نالەبارەکانی دەستبەسەرکردن و هەروەها پێشێلکردنی پەیماننامە نێودەوڵەتییەکانی پاراستنی مافەکانی مرۆڤ کرا.
١. هێرشە مووشەکییەکان بۆ سەر کەمپە مەدەنییەکانی بنەماڵەی پێشمەرگە
لە تەوەرێکی دیکەی کۆبوونەوەکەدا، باس لە هێرشە مووشەکییەکانی کۆماری ئیسلامیی ئێران بۆ سەر بارەگا و کەمپەکانی نیشتەجێبوونی بنەماڵەی پێشمەرگە کرا.
نوێنەری یەکیەتیی ژنان ئاماژەی بەوە کرد کە بە ئامانجگیرانی شوێنە مەدەنییەکان، وەک قوتابخانە و ناوەندە تەندروستییەکان لە لایەن ڕێژیمی کۆماری ئیسلامی ئێرانەوە، پێویستی بە لێکۆڵینەوە و هەڵسەنگاندنی نێودەوڵەتی هەیە. هەروەها جەختی لەسەر ئەوە کردەوە کە ئەم هێرشانە بوونەتە هۆی ئاوارەبوونەوەی ژنان و منداڵان و لێکەوتنەوەی خەساری گەورەی مرۆیی.
١. پێشکەشکردنی پڕۆژەی هاوبەشی «ژن، ژیان، ئازادی»
لە بەشی کۆتایی دیدارەکەدا، خاتوو شەیدا ویجدانی پرۆژەیەکی هاوبەشی لە ژێر دروشمی «ژن، ژیان، ئازادی» پێشکەش کرد.
ئامانجی ئەم پڕۆژەیە پتەوکردنی هاوکاریی نێوان یەکیەتیی ژنانی دێموکرات و ئەندامانی پەرلەمانی فەڕانسە، و دروستکردنی میکانیزمێکی بەردەوام بۆ گەیاندنی دەنگی ژنانی کوردستان و دۆسیەی زیندانیانی سیاسی بۆ ناوەندە بڕیاردەرە نێودەوڵەتییەکانە.
کۆتایی دیدار
لە کۆتایی کۆبوونەوەکەدا، خاتوو ئایدا هادیزادە پشتیوانیی خۆی لە گرنگیی پاراستنی مافەکانی مرۆڤ و بەردەوامبوونی گفتوگۆ لەسەر ئەم بابەتانە دەربڕی.
پاشان، لەگەڵ خاتوو شەیدا ویجدانی گەشتێکی کارییان لە هۆڵەکانی پەرلەمانی فەڕانسە ئەنجامدا و سەردانی پەیکەری ژینا ئەمینییان کرد، کە وەک هێمایەک بۆ بزوتنەوەی «ژن، ژیان، ئازادی» لە ئەنجومەنی نیشتمانیی فەڕانسە داندراوە.
یەکیەتیی ژنانی دێموکراتی کوردستانی ئێران /دەرەوەی وڵات
۱۷/۷/۲٠۲٦
