خەڵکی ئازادیخوازی ئێران
کۆمەڵانی تێکۆشەری خەڵکی کوردستان!
لە دوای راگەیاندنی بەرز بوونەوەی٣٠٠٪ی نرخ بێنزین لە لایەن دەوڵەتی کۆماری ئیسلامییەوە، خەڵکی شار و ناوچە جیاجیاکانی ئێران و كوردستان ناڕەزایەتی خۆیان بەم بڕیارە و هەروەها دۆخی قەیراناوی ژیان لە ئێران و بێکفایەتی و بێلیاقەتی بەرپرسانی حکومەتی لە بەرانبەر چارەسەری قەیران و کێشەکانی خەڵک، بە هێمنانەترین شێوە و بە ڕاگرتنی ئۆتۆمبیلەکانیان، داخستنی شەقام و جادەکان، بێزاری و بێ دەرەتانی خۆیان ڕاگەیاند و بە پێچەوانە کۆماری ئیسلامی و دام و دەزگای سەرکوتی ئەو رژیمە بەوپەڕی سەرلێشاوی و لە رووی ترسەوە دەستیان داوەتە سەرکوتی ئەم نارەزایەتییانە و ئەم کردەوەیەی کۆماری ئیسلامیش قوربانی و برینداری زۆری لێکەوتووەتەوە.
بڕیاری گران کردنی بێنزین بەم شێوەیە کە راستەوخۆ کاریگەری لەسەر ژیانی خەڵک هەیە لە وڵاتێکی کە هەمووان دەزانین وڵاتێکی دەوڵەمەندە بە سامانە سروشتیەکان و بە سیاسەتی هەڵە و زیانباری کۆماری ئیسلامی لە ناوخۆ و دەرەوەی خۆیی دۆخی نالەباری ژیانی بۆ خەڵک بە دیاری هێناوە و ئەم بارودۆخە دەسکردە کە یەخەی هەموو تاکێکی ئەم کۆمەڵگایەی گرتووەتەوە چارەسەرێکی جگە لە دەست لە کارکێشانەوەی ئەو سیستمەو هەموو دەست و پێوەندەکانی نییە.
ئەم بڕیارە ئەگەرچی کاریگەری خراپی لەسەر ژیانی خەڵک دەبێت بەڵام هاوکات پەیامی بە بونبەست گەیشتنی ئەو رژیمەی پێیەو و ئەوەمان بۆ دەردەخات کە کۆماری ئیسلامی تووشبووی نەخۆشێنێکە کە چارەسەری زۆر ئەستەمەو و لە دوایین هەناسەکانی خۆیدا تەقەلا دەکات.
ئێمە وەک ناوەندی ژنانی رۆژهەڵات ئەم نارەزایەتییانە کە زیاتر لە ٥٠ شاری ئێرانی گرتووەتەوە بەحەق و بە رەوا دەزانین و وێڕای دەڕبڕینی هاوخەمی خۆمان لەگەڵ خەڵکی ئێران و مەحکووم کردنی توندوتیژییە نەهادینە بووەکانی کۆماری ئیسلامی بەرانبەر بە گەلانی ئێران پشتیوانی داخوازییە بەرحەقەکانی خەڵکی ئێران و کوردستانین و هیوا دەخوازین دەنگی ئەم داخوازییە رەوایانە تا بێت بەرزتر و رەساتر بێت و چۆک بەم سیستمە دواکەوتووە دیکتاتۆرە بێنێت.
ناوەندی ژنانی رۆژهەڵات
٢٦ی خەزەڵوەری ١٣٩٨ی هەتاوی
