رۆژی سێشەممە رێکەوتی ۷ی گەلاوێژی ۱٤۰٤ی هەتاوی، رێکخراوی ئازادی ژنانی کوردستان (نینا) سەردانی یەکیەتی ژنانی دێموکراتی کوردستانی ئێرانی کرد.
سەرەتای دانیشتنەکە، بۆ رێزگرتن لە ژینگە پارێزانی شەهیدی چەند رۆژی رابردوو لە شاری سنە، چەند ساتێک بێدەنگی راگەیەندرا.
دواتر لە لایەن سکرتێری رێکخراو خاتوو شنە دروودگەرەوە بەخێرهاتنی شاندی میوان کرا کە پێکهاتبوون لە بەڕێز “دڵژین موکریانی” ئەندامی دەستەی بەڕێوەبەری رێکخراوەی “نینا” و شاندی یاوەری و پاشان هەر دوو لایەن پڕژانە سەر چۆنیەتی کار و چالاکی ڕێکخراوەیی خۆیان لە داهاتوودا.
لە بەشێکی دیکەی دانیشتنەکەدا خاتوو شنە دروودگەر باسێکی لە چەند دەیە لە خەباتی بێوچانی رێکخراوەیی یەکیەتی ژنانی دێموکراتی کوردستانی ئێران کرد و رایگەیاند کە لە ماوەی ٨۰ ساڵی رابردوودا، بێ بڕانەوە کار و چالاکی ڕێکخراوەیی یەکیەتی ژنان نەوەستاوە.
لە بەشێکی دیکەی کۆبوونەوەکەدا دۆخی ئێستای ژنانی کوردستان و ئێران و هەروەها پرسی نەتەوە ژێردەستەکان لە ئێران خرایە بەر باس و لەم پێوەندییەدا بەڕێز شنە دروودگەر هەڵسەنگاندنێکی بۆ دۆخی هەنووکەیی ژنانی ئێران بە گشتی و کوردستان بەتایبەتی کرد و رایگەیاند کە، وەک ڕوون و ئاشکرایە، ژنان پێشەنگی خەبات لە دژی هەر چەشنە چەوساندنەوە و هەڵاواردنێکن لە کۆمەڵگەدا و تا بۆنیات نانی کۆمەڵگەیەکی دێموکراتیک و ئاوەدان بەردەوام دەبن لە خەبات و تێکۆشان.
لە کۆتاییدا هەردوو لایەن جەختیان کردەوە کە پابەند دەبن بە هاوکاری و هاوئاهەنگی زیاتری نێوانییان.
یەکیەتی ژنانی دێموکراتی کوردستانی ئێران
۷ی گەلاوێژی ۱٤۰٤ی هەتاوی
