شاندی ڕێکخراوە مەدەنییەکانی کوردستان لەگەڵ ژمارەیەک لە پارلەمانتارانی نۆروێژ کۆبوونەوە

ڕۆژی هەینی، ڕێکەوتی ١٨ی ٩ی ٢٠٢٦، شاندێکی نوێنەرانی ڕێکخراوە مەدەنییەکانی کوردستان لە نۆروێژ، بە مەبەستی تاوتوێکردنی دۆخی ئێران و کوردستان و هەروەها دۆزی کۆمەڵایەتی لە نۆروێژ، لە باڵەخانەی پارلەمانی ئەو وڵاتە لەگەڵ شاندێکی حیزبی کرێکارانی نۆروێژ کۆبوونەوە.

لەو دیدارەدا کە هەردوو ئەندام‌پارلەمانی حیزبی کرێکاران، «تۆنیە برێنا» و «مانی حوسەینی» ئامادەی بوون، شاندی کوردی تیشکیان خستە سەر دوو تەوەری سەرەکی:

یەکەم: هەڵسەنگاندنی دۆخی نالەباری مافی مرۆڤ لە ئێران و کوردستان. شاندەکە ئاماژەیان بەوە کرد کە دوای تێپەڕینی چل ڕۆژ بەسەر پەرەسەندنی گرژییەکان لەنێوان ئێران و ئەمریکا، ڕێوشوێنەکانی سەرکوتکردن، گرتن، ئەشکەنجەدان و کوشتنی هاووڵاتییان لەو ناوچەیە بە شێوەیەکی بەرچاو زیادی کردووە و دۆخەکەی بەرەو خراپتر بردووە.

دووەم: گفتوگۆکردن لەبارەی پەرەسەندنی توندوتیژی لە نۆروێژ و گەڕان بەدوای ڕێگەچارەی هاوبەش بۆ بنبڕکردن و کەمکردنەوەی ئەم دیاردەیە. لەم چوارچێوەیەدا، ڕێکخراوە مەدەنییەکان داوایان لە حیزبی کرێکاران کرد کە بە هاوکاری و هەماهەنگی لەگەڵ ڕێکخراوە مەدەنییەکان، هەنگاوی پراکتیکی بۆ ڕووبەڕووبوونەوەی ئەم کێشە کۆمەڵایەتییە بنێن.

لە کۆتایی کۆبوونەوەکەدا، بەڵگەنامەیەک کە تێیدا وردەکاری و داواکارییەکانی سەرەوە خراوبووە ڕوو، ئاراستەی خاتوو «تۆنیە برێنا» کرا.

شایانی باسە شاندەکەی ڕێکخراوە مەدەنییەکان پێکهاتبوون لە:
– خاتوو ڕەعدە پاڵانی، بەرپرسی گشتیی یەکیەتیی ژنانی دیموکراتی کوردستان لە نۆروێژ.
– کاک قادر عەزیزبەیگی، بەرپرسی گشتیی کۆمەڵەی کولتووریی کوردی.
– کاک کامیل قادری، ئەندامی کۆمەڵەی گشتیی کوردی.
– خاتوو شانیا ساڵحی، بەرپرسی کۆمەڵەی کولتووریی کوردیی ڕۆمەریکەی خواروو.

ئەم چالاکییە لەلایەن «یەکیەتیی ژنانی دیموکراتی کوردستانی ئێران لە نۆروێژ»، «کۆمەڵەی کولتووریی گشتیی کوردی لە نۆروێژ» و «کۆمەڵەی کولتووریی کوردیی ڕۆمەریکەی خواروو»ەوە ڕێکخرابوو.