شەھلا کاوە
ڕێکەوتی ٢٧/٩/٢٠٢٥ شانۆیەک لە زانکۆی ئەمریکی لە سلێمانی بەڕێوەچوو.
گرووپی ھونەری “ھونەرگەھا وڵات” لەلایەن ئەمریکا و بۆ بەشداری لە بەرنامەی کوردناسی بانگێشت کرابوون.
ئەو بەرنامەیە سێ ڕۆژی خایاند و لەکۆتا ڕۆژیدا کۆمەڵێک کچ شانۆیەکیان بەڕێوەبرد کە بەشێک لەخەڵکی خۆشحاڵ کرد و بەشێکی دیکەی تووڕە کرد.
شانۆکەبەوشێوەیە بوو کە کچەکان بە جلێکی نامۆی ناکوردییەوە دەست بە سەما دەکەن و پاش کەمێک دەیدڕێنن و کەواوپانتۆڵی کوردی جوان لەژێریەوە دەردەکەوێ و ھەموو دەست بەھەڵپەڕین دەکەن و شایی و بڕوا بەخۆبوون و فەخر لە ڕووخسارین دیارە.
زۆر باشەکە کوردناسی و مەسەلەی کورد لەزانکۆکان گرینگی پێ دەدرێ و لەبەشەکانی دیکەی کوردستانەوە بانگھێشت و بەشدار ئەکرێن . ئەوە یەکەمجارە کە ئەو زانکۆیە بەرنامەی ئاوای ئەبێ و ٧٥کەس لە نووسەر و ئەدیبە ھەرە بەرچاوەکانی چوارپارچەی کوردستان تێدا بەشدارن.
ئەوە جێی ئاماژەیە ژنانیش ڕۆڵی کارای تێیدا ئەگێڕن و ڕۆڵەکە باس لە زاڵبوون بەسەر داعشدا دەکات.
ئەوانەی کە شانۆکەیان پێ ناخۆش بوو دەڵێن:
ئەوجل فڕێدانە بێ ڕێزییە ئایینی ئیسلام و ئەوە بەرگێکی ئیسلامییە، ئەمە لە حاڵێکدایە جلی کوردی ھیچ دانەپۆشراوییەکی نییە و بەرگی ڕەسەنی نەتەوەی کوردە کە باوباپیران و دایک و دایەگەورەیشمان کە بڕوادار بە دینی ئیسلام بوون و تەنانەت ئەوانەی بڕوایان بە ئایینەکانی تریش ھەبووە ئەو بەرگەیان بەردەوام لەبەر بووە و پاراستوویانە و بەئێمەیان ناساندووە.
ھەموو ئەوانەی شاھیدی دەسدرێژی و ھێرشی دڕندانەی” دەوڵەتی ئیسلامی عێراق و شام” (داعش) بۆ سەر کوردستان بوون دەزانن کە ئەو بەرگە تەواو باڵا ڕەش و ناحەزە کە کەس نازانێ ژنی لەنێو دایە یان پیاو ھاوردەی دەستی داعشە و لەو ناوچانەی داعش داگیری ئەکردن ئەو بەرگە زۆرە ملێ بوو و نافەرمانی بە پۆشینی سزای بە دواوە بوو.
ئەوانەی بەو شانۆیە دڵخۆش و ھیوادار بوون بە بووژاندنەوەی بیری کوردایەتی .
ھۆکار
لەم ساڵانەی دواییدا لە نەورۆز و زەماوەند و دەیان ڕێوڕەسمی خەڵکی کوردستاندا کەواوپانتۆڵ وجامەنە و بەتایبەت ڕەنگە خاکییەکەی کە تایبەت بە پێشمەرگەیە لەبەر دەکرا و دەیان لاوی نیشتمانی لەسەر خرایە بەندیخانە و ژێر ئەشکەنجە و چاوەدێری.
کورد تەنیا بەکوشتن و بێسەروشوێن کردن پەلاماری نەدراوە بەڵکوو بەشێوازێکی نەرم و سیستماتیک و فێڵاوی زمان و بەرگی بێگانەی لەھین خۆی بەباشتر لەقەڵەم دراوە.
لەدوای ھێرشی داعش بەبیانووی ئیسلامیبوون و پۆشتەی ئەو نیقابە ڕەش و جلەی کە کەس نازانێ ھین کێیە ڕەواجی پێدراوە و لەشارەکانی کوردستاندا دەبینرێن.
گرینگترین گۆشە نیگا بۆ ئەوشانۆیە ھێمای زاڵبوونی ژنانە بەسەر بیری ڕەشی داعشیدا کە زیانی ھەرەگەورە بەر کچانی کورد کەوت لەشەڕی داعشدا و ھەرکچانیش بوون کۆتاییان بەو پەلامارە تیرۆریستییە لە شەنگال و کۆبانی ھێنا.
پەیامێکی باشی دیکەی شانۆکە ئەوە بوو کە سەرەتا بە جلی بیانییەوە سەمای بیانی دەکەن کە ھیچی ھین کورد نین دواتر کە جلەکان دەدڕێنن و ھەڵپەڕکێی جوانی کوردی ئەکەن ئەتوانێ بەو مانا بێت کە نە جلی یەکەم نە جووڵەی یەکەم ھین ئێمە نین بەڵکوو دووەم موڵکی ئێمەیە و ئەبێ بە شانازییەوە بیپارێزین.
بڕوابەخۆبوونی ئەوکچانە بەجۆرێک کە سەر و سینگیان بەرز ڕاگرتبوو چاو لەچاوی بینەران بە پێکەنینەوە ھەڵدەپەڕین ھەستێکی خۆشی دەدا بەمرۆڤی کورد کە بەڵێ ئێمە شایستەین و ئەبێ نەترسانە بەسەر بێگانە و داگیرکەردا زاڵ بین و خۆمان بەکەمتر لەوان نەزانین .
بورقە ئەو جلەیە کە شانۆکاران فڕێی دەدەن و جلە کوردییەکانیان دەرەکەوێ، شارەزایان دەڵێن ئەو کارە ئاماژەیە بەو کارەی ژنانی ڕەققا کە دوای شکستی داعش وەک سەرکەوتنێک بەسەر ئەو بەڵایەدا بورقەکانیان فڕێدا.
