چیرۆکی کۆڵنەدانی کچێکی بنەماڵەی حیزب
(هەموو سالێک لە کۆتایی ساڵی خۆێندندا چەندیین کچ و ژن لە نێو ڕیزەکانی «حیزبی دێموکراتی کوردستانی ئێران»دا بە سەرکەوتووی قۆناغی خوێندن و زانکۆیان بە باشترین پلە دەبڕن و دەبنە مایەی شانازی بۆ حیزبەکەیان و بنەماڵەی گەورەی دێموکرات).
من «کانی جەهانگیری»، لەدایکبووی نێو شۆڕشم. سەرەتای قۆناغی خوێندنم لە خوێندنگای جێژنیکان دەستپێکرد، دواتر لە قوتابخانەی ئازادی درێژەم بە خوێندن دا و تا قۆناغی ناوەندی هەر لە قوتابخانەی ئازادی بووم. قۆناغی دواناوەندیم لە شاری کۆیە لە قوتابخانەی «سیابۆی کچان» درێژە پێ دا.
دواتر ساڵی ٢٠١٦ هاتم بۆ ولاتی فەرانسە لە شاری پاریس دوای ٦ مانگ لە خوێندنی زمانی فەرانسەوەی لە زانکۆی سیاسنپۆی پاریس، دەستم کرد بە خوێندنی لیسانسی زمان ناسی و شارەستانیەت لە زانکۆی ئینالکۆ، دوای ٣ سال خوێندنی لیسانس دەستم کرد بە خوێندنی ماستەر لە بەشی پەیوەندیەکان کە تێزەکەم لەسەر پەیوەندی دیپلۆماسی حکومەتی هەرێم لەگەل ولاتی فەرانسە نوسی دواتر بە نمرەیەکی باش توانیم بروانامەی ماستەر بەدەست بێنم.
خوێندن و خۆپێگەیاندن بۆ ئێمەی منداڵانی نێو شۆڕش زۆر جیاوازتر و سەخترە تا منداڵانی دیکە. ڕاستە حیزب هەمیشە بەوپەڕی توانایەوە هاوکار بووە و کارئاسانیی زۆری بۆ خوێندکاران کردووە و دەشیکا، بەڵام هەمیشە ترسێک لە دڵی منداڵاندا هەیە کە لەگەڵیدا گەورە دەبن؛ ترسی شەڕ، مووشەکباران و شەهیدبوونی باوک و هاوسەنگەرانمان بە تایبەت کاتێک لە دەرەوەی ولات بی هەستێکی تری هەیە، بەڵام سەرەڕای ئەو هەموو ترس و دڵەڕاوکێ وبێئیمکاناتییە، منداڵانی نێو حیزب هەموو کات لە ئاستێکی زۆر بەرزدا توانیویانە سەرکەوتن بەدەست بێنن.
من وەکوو منداڵێکی نێو شۆڕش، هەمیشە شانازی بە باوکی پێشمەرگەم و دایکیشم دەکەم کە وەک پێشمەرگەیەک هەموو کات پشت و پەنامان بوون. و سپاسی حیزب دێموکرات دەکەم کە پەروەردەیان کردین تا بگەین بە ئامانجەکانمان، ئەم بروانامەیەم لە کاتێکی سەخت و دژواردا کە ڕۆژهەڵاتی کوردستان تێیدایە بەدەست هێنا، وە ئەم بروانامەیە زۆر لەوە زیاترە کە تەنیا دەستکەوتێکی تاکەکەسی بێ . پێشکەشی دایک و باوکم دەکەم پێش هەموو شتێک وە هەرواها پێشکێش بێ بۆ گەلی کورد و کوردستان بەتایبەت حیزبی دێموکراتی کوردستانی ئێران، ئەمە تەنها هەنگاوەی یەکەمە. بەردەوام دەبم لە کارکردن بۆ دۆزی کورد و کوردستان تا گەیشتن بە ئازادی بۆ گەلەکەمان.
