لە شاری فرانکفورت یادی چوارەمین ساڵڕۆژی کۆچی دوایی ژینا ئەمینی بەرز ڕاگیرا
ڕۆژی چوارشەممە، ڕێکەوتی ١٦ی خەرمانانی ٢٧٢٦ی کوردی، هاوکات لەگەڵ چوارەمین ساڵڕۆژی کۆچی ژینا ئەمینی، لە «پلاسی ژینا ئەمینی» لە شاری فرانکفورتی ئەڵمان، بۆنەیەکی یادەوەریی شکۆدارانە بۆ ڕێزگرتن لە یادی ناوبراو و سەرجەم گیانبەختکردووانی ڕێگای ئازادی و دادپەروەری بەڕێوەچوو.
بەشداربووانی بۆنەکە بە هەڵکردنی مۆم و دانانی گوڵ، سۆز و وەفاداریی خۆیان بۆ ئەو قوربانییانە دەربڕی کە لە پێناو بەدیهێنانی ئازادیدا گیانیان بەخت کردووە.
بۆنەکە بە وتارێک لەلایەن بەڕێز ئاسدی، قسەکەری «ئەنجومەنی ژن، ژیان، ئازادی» دەستی پێ کرد. ناوبراو لە وتارەکەیدا تیشکی خستە سەر دۆخی هەنووکەییی ناڕەزایەتییەکان و ئەو مانگرتنە گشتییانەی کە ئەمڕۆ لە شارەکانی کوردستانی ئێران بەڕێوە چوون.
پاشان، بەڕێز هۆمەن، وەک نوێنەری ڕێکخراوی «ئەمنستی نێودەوڵەتی»، لە وتارێکدا ئاماژەی بە بارودۆخی دڵەڕاوکێی زیندانیانی سیاسی کرد و بەوردی لەسەر ڕەوتی پێشێلکارییەکان و کوشتنی بەکۆمەڵی هاووڵاتییان لە ئێران لە ماوەی ٤٧ ساڵی ڕابردوودا دوا.
لە بەشێکی دیکەی ئەم یادکردنەوەیەدا، تارا مواردی، سەرۆکی حیزبی سەوزەکانی فرانکفورت، بە ئامادەبوونی خۆی پشتیوانیی تەواوی خۆی بۆ بانگەوازەکان و داواکارییەکانی ئازادی و بەهاکانی مافی مرۆڤ دەربڕی.
هەروەها پەیامێکی تایبەتی بنەماڵەی ژینا ئەمینی، کە ئاراستەی «ئەنجومەنی ژن، ژیان، ئازادی – فرانکفورت» کرابوو، لەلایەن خانم شەهناز مرتبەوە خوێنرایەوە. لە درێژەی ڕێوڕەسمەکەدا، خانم فەریدە سەلواتی، کە خۆی یەکێک لە برینداربووانی ڕاپەڕینی «ژن، ژیان، ئازادی»یە، بە گوتنی پەیامێکی دوولایەنە بە زمانەکانی کوردی و فارسی، سۆزی خۆی بۆ بنەماڵەی ئەمینی دەربڕی.
لەو کۆبوونەوەیەدا، نوێنەرانی یەکیەتیی ژنانی دێموکراتی کوردستانی ئێران ئامادە بوون و وێڕای بەشداریکردن لە هەڵکردنی مۆم و دانانی گوڵ، یادی قوربانییانی ڕێگای ئازادییان بەرز نرخاند.
ئەم بۆنەیە لە کەشێکی پڕ لە هەست و بەرپرسیارێتیدا کۆتایی هات، کە تێیدا جارێکی دیکە داواکارییەکانی ئازادی، دادپەروەری و پاراستنی مافەکانی مرۆڤ وەک دروشمی سەرەکی و بزوێنەری خەڵک لە ئاستی نێودەوڵەتیدا دەنگدانەوەی هەبوو.
هەواڵ
