لە درێژەی:
ژیان و خوێندنی ئەو خاتوونانەی کە ئەمساڵ لە زانکۆکانی هەرێمی کوردستان پلەی بەرزیان هێناوەتەوە
لە نێو شۆڕشەوە بۆ لووتکەی زانست؛ (چیرۆکی کۆڵنەدانی کچێکی بنەماڵەی حیزب)
(هەموو سالێک لە کۆتایی ساڵی خۆێندندا چەندیین کچ و ژن لە نێو ڕیزەکانی «حیزبی دێموکراتی کوردستانی ئێران»دا بە سەرکەوتووی قۆناغی خوێندن و زانکۆیان بە باشترین پلە دەبڕن و دەبنە مایەی شانازی بۆ حیزبەکەیان و بنەماڵەی گەورەی دێموکرات).
من «گوڵشەن ئەحمەدی»، لەدایکبووی نێو شۆڕشم. سەرەتای قۆناغی خوێندنم لە باخچەی ساوایانی «هەنگ» لە کەمپی ئازادی بوو، دواتر لە قوتابخانەی ئازادی دەستم بە خوێندن کرد و تا قۆناغی ناوەندی هەر لە قوتابخانەی ئازادی درێژەم بە خوێندن دا. قۆناغی دواناوەندیم لە شاری کۆیە لە قوتابخانەی «چرۆی نموونەیی» درێژە پێ دا.
دواتر ساڵی ٢٠٢٢ لە زانکۆی کۆیە، بەشی کارگێڕیی کار وەرگیرام. لە چوار ساڵی خوێندنمدا، لەسەر ئاستی بەشەکەم لە خوێندکارە یەکەمەکان بووم و لە کۆتاییشدا لەسەر ئاستی هەر چوار ساڵەکە، پلەی چوارەمم بەدەست هێنا.
خوێندن و خۆپێگەیاندن بۆ ئێمەی منداڵانی نێو شۆڕش زۆر ئەستەمترە تا منداڵانی دیکە. ڕاستە حیزب هەمیشە بەوپەڕی توانایەوە هاوکار بووە و کارئاسانیی زۆری بۆ خوێندکاران کردووە، بەڵام هەمیشە ترسێک لە دڵی منداڵاندا هەیە کە لەگەڵیدا گەورە دەبن؛ ترسی شەڕ، مووشەکباران و شەهیدبوونی باوک و هاوسەنگەرانمان.
بەڵام سەرەڕای ئەو هەموو ترس و دڵەڕاوکێ و بێئیمکاناتییە، منداڵانی نێو حیزب هەموو کات لە ئاستێکی زۆر بەرزدا توانیویانە سەرکەوتن بەدەست بێنن.
من وەکوو منداڵێکی نێو شۆڕش، هەمیشە شانازی بە باوکی پێشمەرگەم و دایکیشم دەکەم کە وەک پێشمەرگەیەک هەموو کات پشت و پەنامان بوون. دایک و باوکێک کە بە لەخۆبردوویی و گەورەیییان نەیانهێشت ئێمە هەست بەم کەموکوڕییانە بکەین و بۆ پێگەیاندنمان لە هەموو خۆشییەکی خۆیان خۆشبوون. سپاس بۆ حیزبی دیموکراتی کوردستانی ئێران کە بۆ پێگەیاندنی منداڵانی نێو شۆڕش درێغیی نەکردووە.
