ژنان، لاوان و ئازادیخۆازانی کوردستان!

خەڵکی مافخۆازی کوردستان

شەش ساڵ لەوەپێش‌ و لە رۆژی ۱۷ی خەرمانانی ساڵی ۱۳۹۷ی هەتاوی، رژیمی تیرۆریستی كۆماری ئیسلامی ئێران، بنكە‌ و بارەگاكانی حیزبی دیموكراتی لە قوڵایی خاکی هەرێمی كوردستان کردە ئامانجی موشەك و درۆنەکانی خۆی و لە ئەنجامی ئەو هێرشە دڕندانەیەدا، بەداخەوە ۱٦ كەس لە ئەندامانی سەركردایەتی‌ و پێشمەرگەكانی حیزبی دیموكرات شەهید بوون‌ و زیاتر لە ٤۰ كەسی دیکە برینداربوون.
لە نێو ریزی شەهیدەکانی ئەو کارەساتە دڵتەزێنەدا، دوو ژنی سەرکردە و خەباتکاری ئەو حیزبە بەرچاو دەکەون، کە لە دوو بڕگەی زەمەنی جیاوازدا، سکرتێر و بەرپرسی یەکەمی ڕێکخراوەی یەکیەتیی ژنانی دیموکراتی کوردستانی ئێران بوون.
شەهید نەسرین حەداد، لە کاتی شەهیدبوونیدا ئەندامی رێبەری حیزبی دیموکراتی کوردستانی ئێران و پێشتریش ماوەی یەک دەورە سکرتێری یەکیەتیی ژنان بوو و هەروەها شەهید سۆهەیلا قادری، کاتی شەهیدبوونیدا ئەندامانی رێبەری حیزب و هاوکات سکرتێری یەکیەتیی ژنان بوو.
هاونیشتیمانیانی خۆڕاگر!

لە کەس شاراوە نییە کە بناغەی سیاسەتەکانی كۆماری ئیسلامی ئێران لە زیاتر لە چوار دەیەی رابردوودا، سەركوتی هەر دەنگێكی ئازادیخوازی لە ئێران‌ و بەتایبەتی لە كوردستان بووە. رژیم بە ئەنجامدانی ئەو تاوانە لە رۆژی ۱۷ی خەرمانان، جارێكی دیكە هەوڵیدا ورەی خەباتكارانەی خەڵكی كوردستان‌ و هێزە سیاسیەكانی كورد بڕوخێنێت‌ و چاوترسێنیان بكات، بەڵام بزوتنەوەی حەقخوازانەی خەڵكی كوردستان لە رابردودا سەلماندوویەتی کە، لە پاش هەر تاوانێكی لەو چەشنە، زیاتر لە پێشوو پێداگری لەسەر بەدەستهێنانی ئازادی‌ و مافە رەواكانی گەلی كورد دەکات.
هەر بۆیەش دوابەدوای ئەو جینایەتەی تیرۆریستییەی ڕێژیم، خەڵكی خەباتكاری كوردستان لەسەر داوای حیزبە سیاسییەكانی خۆیان، سێ رۆژ دواتوو و لە رۆژی ٢١ی خەرمانانی ١٣٩٧ی هەتاوی، مانگرتنێكی سەرتاسەریان لە رۆژهەڵاتی كوردستان راگەیاند و بۆ جارێكی دیكە تاوانەكانی كۆماری ئیسلامییان شەرمەزار كرد.
یەکیەیتی ژنانی دیموکراتی کوردستانی ئێرانیش، بە نۆرەی خۆی چ لە رابردوودا و چ دوای کارەساتی ۱۷ی خەرمانان، ئەو جینایەتەی کۆماری ئیسلامی ئیرانی مەحکووم و شەرمەزار کرد.
جارێکی دیکە یادی شەهیدانی ١٧ی خەرمانان و هەموو ئەو شەهیدانەی کە لە پێناوی ئامانجەکانی بزووتنەوەی ئازادیخوازانەی گەلی کورد گیانی خۆیان بەخت کردووە بەرز ڕادەگرین و بەڵێن دەدەین، کە زیاتر لە جاران بۆ وەدیهاتنی ئاواتە بەرزەکانیان تێ بکۆشین.

ڕاگەیاندی یەکیەتیی ژنانی دیموکراتی کوردستانی ئێران
۱۷ی خەرمانانی ۱٤۰۳ی هەتاوی
۷ی سێپتامبری ۲۰۲٤ی زائینی