یەکیەتیی ژنانی دێموکراتی کوردستان، بەمەبەستی ناساندنی ئەندامانی خۆی هەرجارەی لەگەڵ یەکێک لە ئەندامانی خۆی چاوپێکەوتن دەکا و تیشک دەخاتە سەر ژیانی تایبەت و چۆنیەتی ژیانی ئێستا و تێکۆشانی هەرکام لە ئەندامانی خۆی لە ڕێکخراوەکەدا.
چاوپێکەوتنی ئەمجارەمان لەگەڵ هاوڕێی بەڕێزمان خاتوو شوعلە قادری یە.
۱. دەکرێ خۆت بە خوێنەرانمان بناسێنی و بە کورتی ئاوڕێک لە ژیانی تایبەتی خۆت بدەیتەوە؟
من شوعلە قادری ساڵی ١٩٦٦ی زایینی (١٣٤٥ی هەتاوی) لە شاری پیرانشار لە دایک بووم. خوێندنی سەرەتایی وناوەندی و دوو ساڵی دواناوەندیم لەو شارە تەواو کرد. لە ناو شۆڕش دا توانیم موتەفەریقە ئیمتحان بدەم و دیپلۆمەکەم تەواو بکەم. له ساڵی ١٣٥٧ لە قوتابخانهکهی ئێمەدا یهکێتی لاوان دامهزرا و لاوهکان به عهشقهوه روویان تێدەکرد. منیش یەکێک لەو لاوە تازەپێگەیشتووانە بووم کە بووم بە ئەندامی ئەو رێکخراوەیە کە ئەو کات ناوی سازمانی جەوانان بوو. گشتمان چالاک بووین و کهس پێشی پێنهدهگرتین. مودیری قوتابخانەکەمان بهرپرسی کۆمیتهی شاریش بوو. حهزی له تێکۆشانی سیاسی لاوهکان بوو. من و کچانیتر بهو پهڕی ئازادییهوه خهریکی خهباتی خۆمان بووین و پێویست نهبوو ئیزن له کهس وهربگرین و ساڵی ١٣٥٨ی هەتاوی بە ڕەسمی بووم بە ئەندامی حیزب و ماوەی ٢٠ ساڵ مامۆستای شۆڕش بووم.
ساڵی ١٩٨٧ی زایینی لە شیمیایی بارانی شاری هەڵەبجەی باشووری کوردستان, لە لایەن پاسدارانی ئێران ئەسیر کرام و خۆم و کۆرپەیەکم کە تەنیا یەک ساڵو ٤ مانگی تەمەن بوو ١٣ مانگ لە بەندیخانەکانی ئێران ماینەوە.
۲. لە چ ساڵێکدا زێدی خۆتت بەجێ هێشتووە و کەی هاتووی بۆ سوئێد؟
ساڵی ١٣٥٩ی هەتاوی لەگەڵ بنەماڵەکەم لە زێدی خۆم یانی شاری پیرانشار دوور کەوتینەوە و تێکەڵ بە ژیانی شۆڕشگێڕی بووین.
ساڵی ٢٠٠٢ی زایینی لەگەڵ بنەماڵەکەم رێگای هەندەرانم گرتە بەر و لە شاری ئۆرێبرووی وڵاتی سوئێد نیشتەجێ بووین. لە شوێنی ژیانی تازەشم زوو پێوەندیم بە کۆمیتەی سوئێدی حیزبی دێموکڕاتی کوردستان گرتەوە.
۳. ڕادەی خوێندەواریتان پێش هاتن بۆ سوئێد چەند بووە و لێرە چیتان خوێندووە؟
هەر وەک لە سەرەوە باسم کردووە، من لە ئێران دیپلۆمم وەرگرتووە و پاش هاتنم بۆ سوئێد هاوکات لەگەڵ چالاکی حیزبی و یەکیەتیی ژنان، دەستم بە فیر بوونی زمانی سوئێدی کردو توانیم مەدرەکی کار لە رەوزە وەدەست بێنم.
٤. باسێک لە چۆنیەتی پێوەندیتان بە یەکیەتیی ژنانەوە و کار و چالاکییەکانی خۆتان لەو ڕێکخراوەدا بکەن.
هەر لە سەرەتاکانی دەسپێکردنی چالاکی ژنان لە شۆڕشدا، وەک ئەندامێکی ئەو ڕێکخراوە دەستم بە کار کرد و ئەرکی شانەبەندی ژنانم بەڕێوە دەبرد. ساڵی ٢٠٠٧ی زایینی وەک بەرپرسی یەکیەتیی ژنانی دیـموکڕاتی کوردستان لە وڵاتی سوئێد دیاری کرام، دواتر ساڵ بەدوای ساڵ تا ساڵی ٢٠١٣ لە کۆنفرانسەکان ئەو ئەرکەم پێ سپێردرایەوە. بە خۆشییەوە هەر وەک هەموو لایەک ئاگادارن ئێستاش کۆمیتەیەکی سەرکەوتوومان لە بواری چالاکییەکانی تایبەت بە ژنانی کورد لە وڵاتی سوئێد هەیە.
لە ساڵی ٢٠١١ی زایینی، کە یەکەم کۆنفرانسی دەرەوەی وڵاتی یەکیەتیی ژنانمان گرت، وەک بەرپرسی یەکیەتیی ژنانی دەرەوەی وڵات هەڵبژێردرام و تا ساڵی ٢٠١٥ ئەو ئەرکەم بەڕێوە برد.
٥. لە ئێستادا بە چییەوە سەرقاڵن و لەگەڵ ژیانی ئێرە چۆن خۆتان ڕێک خستووە؟
لە دوای ساڵی ٢٠١٧ وە بە هۆی بواری خەراپی جیسمی خانەنشین بوومە و لە ماڵەوەم و خەریکی کاری حیزبی و ڕێکخراوەییم. بەرپرسایەتی کۆمیتەی یەکیەتیی ژنان لە شاری ئۆرێبروو و هەروەها ئەندامی بەڕیوەبەری کۆمیتەی حیزبیم لەو شارە لە ئەستۆیە.
٦. ئەگەر لە کۆتاییدا قسەیەکتان بۆ خوێنەرانمان هەیە، فەرموون.
بەو هیوایە بواری جیسمیم دەرەتانم پێبدا جارێكی دیکە وەک تاکێکی چالاک بتوانم ئەرکەکانم بەڕێوە بەرم.
زۆر سپاس بۆ بەشداریتان لەم چاوپێکەوتنەدا.
