من خەدیجە رۆستەمی لە ساڵی ۱۳٤۸ لە گوندی شەرەفکەند سەر بە شاری بۆکان لە دایک بووم. بە هۆی ئەوەی کە باوکم دژ بە ڕێژیمی پاشایەتی بووە و نەیویستووە سەربازی بکات، ناچار دەبێت ماڵ بار کات بۆ پیرانشار و ماوەی چەند ساڵێک لەوێ نیشتەجێ بووین. تەمەنم ۷ ساڵان بوو کە بۆ جارێکی دیکە گەڕاینەوە بۆکان.

من هەر زۆر زوو تێکەڵاوی شۆڕش بووم. باوکم لە زۆربەی خۆپیشاندانەکاندا بەشداری دەکرد و ماڵی ئێمە وەک بنکەی حیزب وابوو، چونکە زۆر لە خزمەکانمان پیشمەرگەی حیزبی دێموکرات بوون. ئەو کات بوکان ئازاد بوو و منیش وەک زۆربەی لاوانی کورد دەمهەویست ببم بە پێشمەرگە. بەڵام لە بەر ئەوەی کە تەمەن کەم بوو وەرنەدەگیرام. پاش ئەوەی شاری بۆکان لە لایەن کوماری ئیسلامی یەوە دەستی بەسەر داگیرا و پیشمەرگە لە شار نەما، رژیم دەستی کرد بە ڕەشبگیری لاوانی شاری بۆکان و منیش ناچاربووم خۆم بشارمەوە بۆ ئەوەی نەمگرن. ئەوەش کارێکی هاسان نەبوو. و هەر بۆیە بڕیارم دا ببم بە پێشمەرگە و هاوینی ساڵی ۱۳٦۱ شارم بەجێ هێشت و بەرەو گوندەکانی ناوچە وەڕێ کەوتم و لە نەخۆشخانەی حیزب بوومە پێشمەرگە. ساڵی ۱۳٦۲ وەک کادری دەرمانی درام بە کۆمیتە شارستان و تا ساڵی ۱۳٦٥ و لە سەخت ترین ڕۆژەکانی پێشمەرگایەتی سەردەمی شاخ لەوێ بووم.

پاییزی ساڵی۱۳٦٥ بە زۆری رەوانەی بنکەی دەفتەری سیاسی یان کردم.

چەند مانگێک لەوێ بووم و پاشان درام بە ئاسایشگا و لەوێ دەستم بە کار کرد. پاشان دیسان لە نەخۆشخانەی ۲٥ی گلاوێژ دەستم بە کار کردەوە. لە زۆربەی بەشەکانی کارم کردەووە، بەڵام بەشی ژنان و منداڵان کاری راستەو خۆی من بووە لە قەندیل و کۆیە و نەخۆشخانی ئازادی.

من دوو جار هاوسەرگیریم کردووە و خاوەنی کچ و کوڕێکم بە نێوەکانی سۆما و دیار.

من ساڵی ۱۳٦۱شاری خۆم، بۆکانم بە جێ هێشتوە و ساڵی ۱۳٦٥ رۆژهەڵاتم بەرەو کوردستانی باشوور جێهێشت و ساڵی ۱۹۹٦ هاتمە وڵاتی سوید و لەو کاتەوە لە شاری ئوپسالا نیشتەجێم.

وەک باسم کرد، بابم دژی ڕێژیمی پاشایەتی بوو و بەو هۆیەوە نەیتوانی شناسنامە بۆ من و خوشک و براکانم وەرگرێ. کاتێک کە شناسنامەمان پێ درا، من کە منداڵی گەورەی ماڵ بووم و تەمەنم لە هەمووان زیاتر بوو، نەمتوانی بچمە قوتابخانە و لە بەشی گەورەساڵاندا توانیم تا سێی سەرەتایی بخوێنم و لە نێو حیزبیشدا تا پێنجی سەرەتاییم خوێندووە. لە سوید پاش تەواو کردنی دەورەی فێربوونی زمانی سویدی، لە بەشی دەرمانیدا درێژەم بە خوێندن داو توانیم مەدرەکی یاریدەدەری پەرەستار (undersköterska) وەرگرم.

هەر سەرەتای هاتنم بۆ نێو حیزب و ساڵی ۱۳٦٥ بووم بە ئەندامی یەکیەتیی ژنان و لە یەکەم کۆبوونەوەی نوێژەن کردنەوە دا بەشدار بووم. هەر لەو کاتەوە لە خزمەتی ڕێکخراوەکەمان دام و سێ دەورەشە ئەندامی کۆمیتەی بەڕێوە بەریم لە سوید.

وەک هەموو دانیشتوانی دەرەوەی وڵات، هەم ئەرکی ماڵەوە بەرێوە دەبەم و هەم کاریش دەکەم. سەرەڕای ئەوانە بە کاری حیزبی و یەکیەتیی ژنانیشەوە سەرقاڵم و لە نەخۆشخانە و بەشی پێڕاگەیشتنی خاوەن پێداویستی دەرمانی وەک یاریدەدەری پەرەستار کار دەکەم.

هیوادارم کە توانیبێتم خۆم بە ئێوە بناسێنم و هەروەها هیوادارم کە هەموومان پێکەوە هەوڵ بدەین بۆ گەیشتن بە ئامانجەکانمان و دەستەبەر کردنی یەکسانی لە کۆمەڵگا و بنەماڵەدا. سپاس بۆ بەسەر کردنەوەتان.

سپاس بۆ بەشداریتان لەم چاوپێکەوتنەدا و بە هیوای سەرکەوتن بۆ ئێوەی ئازیز.