رۆژی یەکشەممە رێکەوتی ١٨ـ٠٥ـ٢٠٢٥ کۆمیتەی ئۆرێبروی یەکیەتی ژنانی دێموکڕاتی کوردستانی ئێران کۆنفڕانسی ساڵانەی خۆی بە بەشداری زۆربەی ئەندامەکانی لەو شارە بەڕێوە برد.
کۆنفڕانس بە سروودی نەتەوایەتی ئەیرەقیب و خولەکێک بێدەنگی بۆ رێز گرتن لە گیانی پاکی سەرجەم شەهیدانی کورد و کوردستان دەستی بەکارەکانی کرد.
سەرەتا لە لایەن خاتوو ئایدا هوشمەند وەک بەڕێوەبەری کۆنفڕانس بەخێر هاتنی بەشداران کراو رێژەوەی کاری کۆنفڕانس خوێندرایەوە.
پاشان پەیامی کۆمیتەی سوئێدی یەکیەتی ژنان لە لایەن خاتوو باوان کەریمی ئەندامی دەستەی بەڕێوەبەری یەکیەتیی ژنانی دێموکراتی کوردستان کۆمیتەی سوئێد خوێندرایەوە. لە پەیامەکەدا دوای پیرۆزبایی گرتنی کۆنفڕانس گوترابوو ” بێشک گرتنی کۆنفڕانس هەست پێکردن بە بەرپرسایەتیو هەنگاونانە بۆ کارو بەڕێوەبردنی کارو چالاکیو ئەرکەکان بە مکانیزمو شێوازێکی رێکو پێکتر”.
لە بەشێکی دیکەی پەیامی یەکیەتی ژناندا هاتبوو ” لە ماوەی دوو ساڵو چەند مانگی رابردووداو بە تایبەتی لە بزووتنەو شۆڕشی ژینا و نەورۆزی خاکیپۆشاندا کیژو لاوی کورد بە هەست کردن بە بەرپرسایەتی تەختو بەختی زۆرداری رژێمی ئێرانیان وەلەرزە خستو هەنووکەش ئەو خەباتە بە شێوەی جۆراجۆرو کار کردن لە نێو رێکخراوە مەدنیەکان زۆر بوێرانەو نەترسانە لە نێوخۆی وڵاتو دەرەوەی وڵات بەردەوامە”.
لە بەشێکی دیکە پەیامەکەدا ئاماژە بە ناوی خاتوونە ناودارەکانی کورد کرابوو کە ” زۆرن ئەو خاتوونانەی کە بە هێزو توانای بەرزی خۆیان لەمپەری سەر رێگای ژیانی خۆیان لابردوەو شانبە شانی نیوەکەی دیکەی کۆمەڵ هاتوونەتە مەیدانو بگرە زیاتریش خەباتیان کردوە. ئەگەر چاو لە مێژووی ژنانی کوردو خەباتی پڕلە سەربەرزیان بکەین دەبینین کە بە سەدان ژن لە ریزی خەبات دا سەربەرزانە تێکۆشاون”.
دواتر پەیامی کۆمیتەی ئۆرێبروی حیزبی دێموکڕاتی کوردستانی ئێران لە لایەن کاک کەریم بابەکری بەرپرسی کۆمیتە پێشکەش کرا. لە پەیامەکەی کۆمیتەی حیزبی دا هاتبوو ” هەر لە دەورانی کۆماری کوردستانەوە حیزبی دێموکڕات ئەو راستییەی بۆ دەرکەوتبوو کە بێ بەشداری ژنان لە خەبات و بەڕێوەبردنی وڵات کەلێنێکی گەورە پەیدا دەبێ، هەر بۆیە لەو کاتەوە رێکخراوی یەکیەتی ژنانیان دامەزراندوەو وەک دەبینین بە خۆشیەوە ئێستاش هەوروا هەڵسووڕو بەرچاو لە مەیدانی خەبات دا ماوەتەوە”.
دوابەداوی پێشکەش کردنی پەیامەکان خاتوو شۆعلە قادری بەرپرسی کۆمیتە راپۆرتی کارو چالاکی نێوان دوو کۆنفڕانس خوێندەوە، ناوبراو لە بەشی کۆتایی راپۆرتەکەدا سوپاسی خۆی ئاراستەی ئەندامانی ئۆرێبرو و بە تایبەتی ئەوانەی کە لە هەموو بوارەکاندا پشتیوانو هاوکاری کۆمیتە بوونە، کردو کوتی بێشک هیچ رێکخراوێک ناتوانی بێ پشتیوانی ئەندامەکانی لە کارو چالاکیەکاندا بەردەوامو سەرکەتوو بێت.
پاشان خاتوو ئایدا هوشمەند بەرپرسی ماڵی کۆمیتە راپۆرتی ماڵی پێشکەش کردو بە وردی ئاماژەی بە داهاتو دەرکەوتی رێکخراوەکە لە نێوان دوو کۆنفڕانسدا کرد. دوابەدوای ئەو دا خاتوو باوان کەریمی وەک چاوەدێری دارایی کۆمیتە راپۆرتێکی کورتی لەسەر پێداچوونەوەی کاری دارایی پێشکەش کرد.
پێویست بە ئاماژەیە کە خاتوو خەجیج رۆستەمی بەرپرسی بەشی تەشکیلاتی کۆمیتەی سوئێد بە چەند وتەیەک لەسەر ئەرکو مافی ئەندام لە رێکخراوەکە بەشداری لە کۆنفرانسەکەدا کردو لە نزیکەوە وڵامی بەشێک لە پرسیاری بەشدارانی دایەوە.
لە بەشی تاووتوێ کردنی ئاییننامەی کاری کۆمیتە چەند تێبینییەک هاتنە بەرباسو بە دەنگی کۆنفڕانس بڕیار درا کە لە ئایینامەکەدا بگونجێ.
دوای تاووتوێ کردنی راپۆرتەکانو وڵامدانەوەی پرسیارەکانی بەشداران، راپۆرتەکان دەنگیان بۆ وەرگیراو بە تێکڕای دەنگی ئەندامانی بەشدار تەئید کران و گەردنی کۆمیتە ئازاد کرا.
بەشی کۆتایی کۆنفڕانس تەرخان کرابوو بە هەڵبژاردنی کۆمیتەی تازە کە لە کەشێکی ئازاد دا بەڕێوەبەرێکی نوێ پێکهاتوو لە ٥ ئەندامی ئەسڵی و ١ ئەندامی جێگرو هەروەها چاوەدێری دارایی هەڵبژێردارن.
کۆنفڕانس دوای ٣ کاتژمێر کۆتایی بە کارەکانی خۆی هێنا.
کۆمیتەی ئۆرێبروی یەکیەتی ژنانی دێموکڕاتی کوردستانی ئێران – سوئێد
١٨ـ٠٥ـ٢٠٢٥
