ناسک نەسیری
لە ڕاستیدا، فێمینیزمیش وەک هەر ئیزم و ئایدیایەکی ترە، بۆ جێ بە جێ کران و قایم کردنی پێگەکانی لە ڕووی کردەییەوە، پێویستیی بە خاک بە واتای نیشتمان هەیە، جا ئەگەر هات و ئەم فێمیزمە لە نیشتمان و خاکی خۆیدا چەکەرەی نەکرد و نەڕوا و گەشەی نەکرد، ئەوا دوو خەساری بەردەکەوێ:
یەک: لە خاک و نیشتمانی خۆیدا جێگیر نابێ و نالکێ، چونکوو لە ڕاستیدا بە هۆی خاڵی دووهەمەوە، ئەو خاکە زێدی نییە؛
دوو: ڕەنگی ئەو زێدە دەگرێ کە لێی لە دایک بووە و ڕەنگی ئەو زێدە کە گوایە کاری بۆ دەکات، ناگرێ.
نکوڵیی لێ ناکرێ کە مرۆڤیش وەک هەر زیندەوارێکی تر، کارتێکەریی ژینگەی لەسەرە. بۆیەش ئەو فێمینیستانەی کە لە ژینگەیەکی تر بەدەر لە کوردستان دەژین، تووشی دوو کێشەی سەرەکی دەبن:
یەک: بە هۆی ژیانیان لە ژینگەیەکی جیادا، خەونەکانیان و خولیاکانیان و کێشەکانیان دەگۆڕدرێن؛ ئەگەرچی ئەوان بانگ و بانگەوازی بۆ ژنی کورد لە کوردستان دەکەن، بەڵام هاوارەکانیان، ڕەنگدانەوەی ئەم کێشانەیە کە خۆیان لە وڵاتی نیشتەجێ بوونیاندا هەیانە کە ئەمەش بۆشایی و کەلێن لە نێوان هاوارەکانی ئەوان و کۆمەڵگەی کوردستاندا چێ دەکات کە دەکرێ بە «ناهاوسەنگیی دەنگ و ژینگە» ناوی بنێین.
دوو: ئەوان ئەگەر هاوارەکەیان ڕەنگی زێدی مەبەست واتا کوردستانیشی لێ بێ، ڕەنگەکە ناتەواوە و تێکەڵەیەکە لە کوڵ و مەراقی خۆیان و خۆزگەیەک کە پێیان وایە بۆ کوردستان هەیانە. ئەمەش وادەکات نەک هەر ئەوان، بگرە خودی فێمینیزم بکەوێتە مەترسییەوە.
جا ئەگەر کۆی ئەم بابەتانە لە تەنیشت ناتێگەیشتوویی زۆرێک لە بەناو فێمینیستەکان لە فێمینیزم، بە هۆی نەخوێندنەوە و جارناش بە هۆی نەخوێندەواری و هەندێک جار بە هۆی نەزانینی زمان و تەنیایی و گۆشەنشینی و نەگونجان لەگەڵ کەلتووری ڕۆژئاواییەک کە زۆریشیان هەوڵ داوە خۆی لەگەڵ بگونجێن بەڵام کۆمەڵگە ڕۆژئاواییەکەش وەک لایەنێکی پەیوەندییەکە بڕیاری خۆی هەیە و گەلێک جاران بڕیارەکەی ڕەتکردنەوە یان لانیکەم وەرنەگیران بەو زۆر و فرەییەی کە چاوەڕوانی دەکرێ، وادەکات تووشی ڕادیکاڵیزە بوون واتا توندڕۆیی ببن و هەندێک چەمک و بابەت بە ناوی فێمینیزم بڵێنەوە و پاتەی بکەنەوە کە لە ڕاستیدا فڕی بەسەر فێمینزیمەوە نەبێ و کوڵی تاکەکەسی بێ کە هەوڵ دەدرێ بەسەر کۆمەڵگەی کوردی و کوردستاندا قاڵب بکرێت کە ئەمە ئەنجامی بەراوەژووی هەیە.
وانییە کە ئەم کێشانە ڕێگاچاریان نەبێ. وەک نموونە دەکرێ ئەم ڕێگاچارانە بخرێنە بەر دەم:
یەک: هەوڵ بۆ تێگەیشتن لە فێمینیزم و ڕەوت و شەپۆلەکان.
دوو: بەراوردکردنی ویستی شەپۆلەکان لەگەڵ کۆمەڵگەی کوردستان.
سێ: سەرهەڵدان و هاتنە ئارای فێمینیزمێکی کوردستانی کە لە خەمی ژنانی کورددا بێ نەک خەمی ژنێکی کورد بکاتە بڵندگۆی فێمینیزم.
چوار: هەوڵ دان بۆ پۆشتەکردنی چالاکانی فێمینیستی ناوخۆ و تێگەیشتن لێیان و باڵ و پشت گرتنیان نەک بوون بە ڕێبەریان.
بەڵام ڕوون و ئاشكرایە کە کۆی ئەوانە دەبەسترێنەوە بە هەبوونی خاک و دەوڵەتی نەتەوەیی لەسەر خاکی نیشتمان.
تێنەگەیشتن لەم چەمک و زاراوایە یان قوربانی کردنی لە ژێر چەمک و ویستی چەپی و مارکسیستیدا کە زۆربەیان لە بنەڕەتدا لەژێر گوتاری دوژمنی داگیرکەردا سازبوون، وایکردووە کە زۆر جار هاواری زۆربەی فێمینیستە ڕۆژئاوایینشینەکان، لەبری ڕێگاپێشاندەری و ڕێنموونیی ژنی کورد بۆ گەیشتن بە مافەکانی، دەبێ و بوون بە دژایەتی و دوژمنایەتی لەگەڵ کۆمەڵگەی کوردستان.
هەوڵدان بۆ بە ئورووپایی کردنی کوردستان- لە هەر ڕوویەکەوە- و بە ئورووپایی کردنی ژنی کوردستان، هەوڵێکی مایەپووچە. ئەوە بەو واتایە نییە کە ژنی کورد بۆی نییە وەک ئورووپایی بپۆشێ و بنۆشێ، بەڵکوو بەو واتایەیە کە دەبێ لە دەلاقەی کوردستانی بوون و خەمی ژنی کوردەوە لە پرسەکان بڕوانین. ئەمەش واتا ناسینی کۆمەڵگەی کوردستان، ناسینی ئازارەکانی ژنی کورد و دۆزینەوەی ڕێگاچارە بۆ چارەسەریی ئەو کێشانە نەک نانەوەی کێشەی تر بۆ ژنی کورد. دەبێت ژنانی فیمینست زۆر باش لەوە تێبگەن گەر بیانەوێت گۆڕانکاری لەسەر ژنانی کورد بکەن بەر لەهەر شتێک خۆئامادە کردنە بۆ بەگژداچونی ئەو هەمو کۆسپ و تەگەرانەی کە ڕێگەیان پێ دەگرێت و پێویستە سیستماتێکی پەروەردەی و باوەڕی زۆر تایبەت بهێنە ئاراوە کە ڕەوتی فیمینیزم لە قاڵبی کوردا جێگەی ببێتەوە .
