شەهید ڕێحانە کەنعانی کە لە تەمەنی 32ساڵێدا لە کاتێکدا کە تەنیا دوو حەفتەی مابوو ببێت بە دایک، لە کەمپی ئازادی حیزبی دێموکراتی کوردستانی ئێران لە کۆیە و لە قووڵایی خاکی باشووری کوردستاندا، ڕۆژی 6ی ڕەزبەر کەفتە بەر پەلاماری موشەکی کۆماری ئیسلامی و شەهید بوو.
شەهید ڕێحانە لە تەمەنی 2ساڵ و نیویدا دایکی خۆشی لە دەست دەدابوو. هەر بەو ساواییە لە ئامێزی میهرەبانی دایکی بێبەش ببوو و ئەو و منداڵێکی تازە لەدایکبوو و باوکێکی خەفەتبار دەمێننەوە. شەهید ڕێحانە لەگەڵ براکەی کە تازە لەدایک ئەبێت لە ناز و موحیبەتی دایک بێبەش ئەبن، لەوکاتەدا باوکیان ناچار ئەبێت بۆ ماوەیەکی کورت منداڵەکانی بە دایکی خۆی، واتە نەنکی ڕێحانە بسپێرێت. چونکە باوکی بەهۆی کاری دەرەوەی ماڵ، نەیدەتوانی دوو منداڵی ساوا بەخێو بکات و پێیان ڕابگا. دوایی باوکی ژیانێکی نوێ لەگەڵ خاتوونێک پێک دێنێ و دوو منداڵە ساواکەی ڕێحانە و براکەی لەگەڵ زڕدایک و باوکی دەستیان بە ژیانێکی نوێ دەکەن. ڕێحانە کچێکی ئارام بوو، بەڵام بەهۆی بێ دایکی مەینەت و ئازار و سەختییەکی زۆری کە دیبووی و بە داخەوە هیچکات ئەو موحیببەت و سەمیمیەتەی کە لە نێوان دایک و کچێکدا پێویستە، لە نێوان خۆی و زڕدایکیدا درووست نەبوو. هەمووکات غەمبار و دڵتەنگ بوو.
شەهید ڕێحانە کاتێک کە مێرمنداڵ بوو هەستی نیشتمانپەروەری لە دڵ و ناخیدا دەست پێدەکا و هەموو کات بیری لەوە دەکردەوە کە دەبێ ڕۆژێک ببێت بە پێشمەرگە و دژی ئەو هەموو زوڵم و زۆرییە کە لە کورد و کوردستان و بەتایبەت لە ژن، لە کۆمەڵگەی ئێرانێکی نادادپەروەر دەکرێت، بوستێتەوە. بەداخەوە دەرفەتی زۆرتری پێ نەدرا تا بتوانێ وەکوو پێشمەرگەی شاخ لە ڕیزەکانی حیزبدا زیاتر لە خزمەت ئامانجەکانی نەتەوەکەیدا بێ.
شەهید ڕێحانە بۆ ماوەی چەند ساڵێک وەکوو ئەندامی نهێنی حیزب لە نێوخۆ ئەرکی پێشمەرگەی شاری بەڕێوە دەبرد تا لەم دواییانەدا لە سالی ١٣٩٨ی هەتاوی بە مەبەستی ژیان پێکهێنان لەگەڵ پێشمەرگەیەکی حیزب ڕووی کردە باشوور و بوو بە ئەندامی ئاشکرای حیزب و هەر لەو ماوەیەشدا بوو بە ئەندامی یەکییەتی ژنان و کۆمیتەی زاگرۆس، ناوبراو یەکێک لە ئەندامانی هەڵسووڕ و چالاک ئەو ڕێکخراوانە بوو.
شەهید ڕێحانە لەو ماوە کورتەدا وەکوو سەرشانەیەکی چالاکی ڕێکخراوەی یەکیەتیی ژنان، هەر ئەرکێکی پێی دەسپێردرا، بەو پەڕی دڵسۆزی و شانازییەوە جێبەجێ دەکرد.
گەورەترین هیوا و ئاواتی ڕزگاری کوردستان بوو و بۆ جارێکی دیکە بە ئازادی بگەڕێتەوە ڕۆژهەڵاتی کوردستان کە بەداخەوە بەو ئاواتەی نەگەیشت و ڕۆژی شەشی ڕەزبەری ساڵی ١٤٠١ی هەتاوی کاتژمێر ١٠و نیوی بەیانی کاتێک کە دەنگی یەکەم مووشەک دەبیستێ لە تاوی هاوسەرەکەی ڕادەکاتە دەرێ و بە لێدانی دووهەم مووشەک زامێکی قورس هەڵدەگرێ، ئەوە لە کاتێکدایە کە تەنیا چەند رۆژی ماوە جوانترین دیاری پێشکەشی ئەو دنیایە و هاوسەری وەفاداری بکا و کۆرپەکەی کە هەر کاتێک دەزانێ کوڕە ناوی “وانیار”ی لەسەر دادەنێ بێنێتە دنیا.
دوکتورەکان هەوڵێکی زۆریان دا تا لە ڕێگای هێنانەسەر دنیای منداڵەکە، لە مردن ڕزگاری بکەن. بە هۆی قووڵی زامەکانی شەهید ڕێحانە، بڕیاریان دا بەرەو هەولێری بەڕێی بکەن، بەڵام زۆر بەداخەوە، یەک دوو کاتژمێر زیاتر نەژیا و تێکەڵ بە کاروانی نەمران بوو و وانیاری ساواش تەنیا کەمتر لە ٢٤ کاتژمێر ژیانی بێ دایکی چێشت و ئەویش بەداخەوە چووە ئامێزی دایکی و دایکی نیشتمان تا هەردووکیان بۆ هەتاهەتایە لە ئامێز بگرێت.
