ئارینا باپیری
سەرەتا سپاس بۆ گۆڤاری ژنان بۆ ئەم بەرسەرکردنەوەیە. سڵاو لە ئێوە و خوێنەرانتان.
ئارینا باپیرم، ساڵی ٢٠٠٦ لە نەخۆشخانەی ئازادی لە کەمپی ئازادی کە یەکێک لە بنکە و بارەگاکانی حیزبی دێموکراتە، لەدایک بووم.
لە دایک و بابێکی پێشمەرگە و بنەماڵەیەکی شۆرشگێر لەدایک بووم. چاوم لە کەمپی ئازادی هەڵێناوە و هەر لەوێش پێم گرتوە و ئەلف بێی خوێندن، ئازادی و خەبات فێربووم.
بابم، ناسراو بە مامە قالە باپیری زیاتر لە چل دەیەیە لە ریزی خەبات دایە و ئێستاش دڵی بۆ ئازادی پڕ لە هیوایەیە، دایکم دەچێتە خانەی ئەو ژنە پێشمەرگانەی کە رۆڵێکی گرینگیان لە بەخێوکردن و گەورەکردنی نەوەی دێموکرات داوە و ئەو خەباتە لەسەر دەستی ئەو ژنە پێشمەرگانە بەمڕۆش گەیشتووە.
هەربۆیە من گەورەبوی بنەماڵەیەکم کە تەمەنیان بەردەوام بۆ ڕزگاری کوردستان داناوە و ئێستاش بەردەوامن و دڵ بە ورە بۆ ڕزگاری ڕۆژهەڵاتی نیشتمان تێدەکۆشن.
لەگەڵ ئەوانەش دا ئەو خەباتە بێ هەوراز و نشێو نابێ و هەربۆیە ئێمە منداڵانی شۆڕش دەکەوینە بەر پشکی ئەو هەوراز و نشێویە و دەبینە بەشێک لەو ئەزمونەی خەباتگێران پێیدا تێدەپەڕن. لەوانە موشەکباران، باری نائەمنی و هەروەها شەوی بێ ئارام.
خۆم وەک یەکێک لە منداڵانی شۆرشم کە قۆناغی سەرەتاییم لە قوتابخانەی ئازادی خوێندوە و تەواوم کردووە. پاشان بۆ قۆناغی ئامادەیی چومەتە قوتابخانەی ئامادەیی کۆیەی کچان.
ئەوەندەی وەبیرم دێ هەمیشە ژیانی ئێمە وەک بەشێک لە بنەماڵەی دێموکرات مەترسی لەلایەن کۆماری ئیسلامییەوە لەسەر بووە، بەڵام هیچ کات نەیانتوانی نە ئێمە لە خوێندن بسڵەمێننەوە و نە دایک و بابم لەو خەباتە سارد بکەنەوە.
بەڵام قۆناغی ئامادەییم جیاواز لە تەنیا مەترسی بوو، ئەودەمەی شۆڕش ژینا/ ژن،ژیان،ئازادی لە ترۆپکی خۆی دابوو، لاوان، پیر و ژن و پیاو دەنگیان بۆ ئازادی هەڵدەبڕی، کۆماری ئیسلامی وەک هەمیشە هات و بنکە و بارەگاکانی شوێنی مانەوەی ئێمەی سڤیلی کردە ئامانج. ئەگەر خۆمان دەرباز نەکردبا رەنگبوو نەمتوانیبا ئەورۆ ئەو دێڕانە بنوسم.
قۆناغێکی تابڵێی سەخت بە وردە برینی سەر لەش و دڵ و دەروونمان. بەڵام برینی سەر دڵمان زۆر گەورەتر بوو ئەگەرچی نادیار بوو. دوبارە ئاوارەبوونەوە، کۆستی لەدەستدانی ئەوانەی لەگەڵیان گەورەبوم و بۆنی نیشتمانم بەوانە کردبوو. هاوکات مەترسی هەر رۆژێک بۆ چونە قوتابخانە و بۆ ماوەیەک کورت دابڕان. بە کورتی بومەلەرزیەک بوو زۆر شتی هەڵتەکاند، ئەمما بە ماوەیەکی کورت دوبارە هەستاینەوە.
مامەقالە و سەعادەتی دایک پشتیوان وەک شاخ بۆ خەبات و بۆ منداڵەکانیان، نەیانهێشت هیوا و ئارەزومان هەرەس بێنێت و هەربۆیەش لەو قۆناغەدا سەختەدا توانیم بە نمرەی باش قۆناغی ١٠ و ١١ تێپەڕێنم و تا گەیشتمە قۆناغی پۆلی دوازدەی ئامادەیی و بەخۆشحاڵییەوە بە کۆنمرەیەکی باش و بەرز ئەو قۆناغە گرینگەی ژیان تێپەڕێنم.
ئەزمونێک کە وەرم گرت و پێم خۆشە لێرە لەگەڵ ئێوە و خوێنەرانی بەش بکەم ئەوە بوو کە مرۆڤ تا هیوا و ورەی هەبێت دەتوانێ گەورەترین کۆسپەکانیش تێپەڕێنێت و بەو ئامانجە بگات کە مەبەستییەتی. ئەوەش لە خەبات بۆ ڕزگاری ڕۆژهەڵات فێربووین. هەروەها هەوڵدانی بەردەوام، دەتوانێ رێگەی سەرکەوتن نزیکتر بکاتەوە.
وەک قوتابیەکی تازە دەرچوو لە پۆلی دوازدە خۆشحاڵم کە توانیومە نمونەیەکی جوان و ئەرێنی بۆ قوتابیەکی رۆژهەڵاتی لە هەرێمی کوردستان بم.
سپاسێکی مەزن بۆ حیزبی دێموکرات کە هەمیشە پشتیوانی ئێمە منداڵانی شۆرش بووە بۆ بەردەوام لە خوێندن و ئاسانکاری بۆ ئەو بەردەوام بوونە. سپاسێکی تایبەت بۆ مامۆستا و قوتابخانەکانم لە قۆناغە جیاوازەکانی خوێندن. هەروەها سپاسێکی بێ پایان بۆ بنەماڵەکەم کە ئەوان نەبان، رەنگبوو گەیشتن بەمڕۆ ئەستەمتر با.
