ڕۆژی شەممە ڕێکەوەتی ٣١-٠٥-٢٠٢٥ هەیئەتێکی یەکیەتیی ژنانی دێموکرات بەسەرپەرستی خاتوو شلێر حەسەنپوور هاوڕێ لەگەڵ بەڕێزان خاتوو خەجیج ڕۆستەمی، خاتوو سوهەیلا مەهدیزادە، خاتوو مەلیحە مەنووچێهری، خاتوو ڕێناس محەممەدیان، خاتوو ئارەزوو حیسامی و خاتوو باوان کەریمی لە سەربانگهێشتی ڕەسمی بنەماڵەی کاک هاشم و پێکهێنەرانی ئەو کۆڕە بەشداریان لە یادی ڕێزلێنان و ناساندنی کتێبی بیرەوەریەکانی زیندەیاد کاک هاشم کەریمی دا کرد، کە لە شاری ستۆکهۆڵم بە بەشداری سەدان کەس لە هاوڕێ و هاوسەنگەرانی ئەو نەمرە بەڕێوەچوو.
کۆڕیادەکە بە سروودی نەتەوایەتی ئەی ڕەقیب و ساتێک بێدەنگی بۆ گیانی پاکی شەهیدان دەستی پێکرد، ڕێژەوی بەرنامە لە لایەن “کاک ئازاد فەتحیان” خوێندرایەوە.
دواتر “خاتوو زێنەب ڕەسووڵپەنا” هاوژینی کاک هاشم بەکورتی چەند وتەیەکی لەسەر ژیان و خەباتی کاک هاشم باس کرد و گوتی: ئەو کتێبە بەشێکە لە ژیانی پڕ لە سەروەری کاک هاشم کە خۆی بەدەستی خۆیی و بە قەڵەمی خۆی نووسیویەتی و ئێمە واتە من و منداڵەکانی شانازی پێوە دەکەین و هیوادارین ئەو کتێبە کە بەشێکە لە مێژووی تێکۆشانی ئەندامێکی سادق و ڕاستگۆی حیزبی دێموکرات لە داهاتوو دا ببێتە ئەزموون بۆ لاوەکان و هەروەها ئاشنابوونیان بە خەبات و تێکۆشانی ئەو کەسانەی وەک هاشم کەریمی هەموو ژیانیان بۆ ئازادی و یەکسانی تەرخان کرد.
لە بەشێکی دیکە دا خاتوو “شیلان ساڵحی” کورتەیەک لە ژیان و بەسەرهاتی کاک هاشم کەریمی خوێندەوە.
دواتر بەڕێز دوکتور “هاشم ئەحمەدزادە” لەسەر ناوی کتێب و نێوەڕۆکی کتێبەکە قسەی کرد و باسی لە گرینگی نووسینەوەی بیرەوەری ئەندامانی حیزب و ڕێکخراوەکان کردو گوتی: کاتێک باس لە مێژوو دەکەین، مەبەست نووسین و بە دێکۆمێنت کردنی ڕاستگۆیانە و بەتایبەتی گێڕانەوە و نووسینی ئەو کەسانەیە کە ئاگاداری ڕووداوەکان بوون و خۆیان بەشیک بوون لەو تێکۆشانە.
شایەنی باسە بۆ ئەو کۆڕیادە چەندین
کەسایەتی و هاوڕێ و هاوسەنگەری کاک هاشم بەشداربوون و قسەیان لە سەر کەسایەتی نەمر کەریمی لە باری سیاسی و کۆمەڵایەتی و هەروەها کتێبی “گەشتێک لە ئاربابای بانەوە بۆ باواجیی کۆیە” دا کرد.
وێڕای سوپاس و ڕێزی کۆمیتەی بەڕێوەبەری لە بنەماڵەی نەمر کاک هاشم، هیوادارین ڕووحی ئەو تێکۆشەرە شاد بێت و یادی هەمیشە بەزیندوویی بمێنێتەوە و ئاوات و خۆزەگەکانی کاک هاشم کە ئازادی و ڕزگاری کوردستان بوو بێتەدی.
یەکیەتیی ژنانی دێموکراتی کوردستانی ئێران کۆمیتەی سوئێد
٣١-٠٥-٢٠٢٥
